Ne znan ako bin se leh smela ale plakala od smeha, aš ča drugo moreš ako ne to dvoje kad pročitaš da je Ministarstvo vanjskih posli Srbije klalo Hrvacku va »naranžasto«, ča će reć da su svojemi građanimi preporučili da k nan putuju leh ako za zbilja moraju. A još san se jače nasmela kad san pročitala odgovor našega ministarstva va komu stoji – zasad se čini da je najveća »napetost« odabir između jadranske obale i hrvatskih kontinentalnih vinskih cesta. Ja bin još dodala i zmed planinski vrhi, toplic i otoki. To j’ tuliko nemo da čovik ne more ni zamislet da j’ nekomu moglo takovo ča napamet past. Govori mi kolega – on ča vavek ima problem z mišon – da bi ti neš napamet moglo past moraš pameti imet. A ja se š njen apsolutno slažen. Lahko j’ mane za te preporuki, dojdu mi kod najbolji vic, mane više pojida to ča će radi ovoga najnovejega rata na Bliskomu istoku, se ceni poć va nebo. A i do sada nisu bile prizemljene. Roditeljica govori – kako smo do sada ćemo i odsada, vavek se nekako zvučemo.

Dakako da j’ dodala kako se njoj niš neće promenit aš je odvavek skromna i ni zvicijana, a ovakovi kod ča san ja, kako j’ lipo rekla – z velin mišon načinjeni, e ti će morat malo pripazit. Neće bit obrnjanja z noson i rivanja pijata leh ćeš pojist ono ča imaš. Daj Bog da imaš. I tako san van ja naslišala još najmanje pol ure o vanjskopolitičkoj situacije, i o momu načinu življenja ko j’ se leh ni ni dobro, ni ispravno. Eto, zato van roditelji služe. A baš san njoj mislela kupit boke rožic za Dan žen, ovako ću njoj donest jedan kaktus z najvećemi bodljami pa nek si bude skromna.

Kad smo već pu Dana žen, dokončala san da nikada od mane feministice. Zač? Pa, zato aš ja mislin da su ženske dominantne na ovomu svitu. Nikada se va životu nisan osjećala ni sled manje jaka, bitna ale slabeja od muškeh pa da mi sad neki reče da napišen nekakov feministički pamflet ja bin se i pokla čuda let pisanja našla na sto čud. Jednostavno mislin da ne postoje nikakovi parametri z keh bin ja iščitala da su ženske slabeje od muških. Za me postoje leh slabi ljudi, opće ih ne delin po spolu. I ča se mane tiče ako postoji Dan žen, trebel bi postojat i Dan muškeh. I to bi se onput zvalo ravnopravnost spolova. Evo, moj kolega Bobo je već žensko leh san ja – nježan, fin, vas nacifran, mehke duše, ume kuhat, peglat, oprat, posnažit. Na stolu mu je saki papirić na svomu mestu, vječito od miša poveda i nidan mu ne valja. A pu mane je se obrnuto, pa sad vi vidite. I ča j’ najvažneje, sklon je semi se oprostit pa će valjda i mane ča san javno razotkrila njegovu tankoćutnu stran. A za pravo reć, morda j’ tomu momu svojevrsnomu antifeminizmu razlog to ča mi odvavek gre na živci kad se neš forsira. A teh štorij od žen i okol žen okol osmoga marta mi je preveć. Te simpoziji, te paneli, te kampanje, te specijali va seh mediji… Ča j’ preveć ni z maslon ni dobro. Bilo žensko, bilo muško treba ga se štimat kod ljudsko biće i onput neće rabit se ono prvo navedeno.

Ono ča mene strahovito gre na živci, a vezano je za spol je kada neki hćeri govori – sine. Pa to već va startu ditetu stavljaš do znanja da si razočaran ča si rodil. I zato, hvala mojoj Roditeljice. Ni malo mi ne pači ča me zove telice, ma da me zazove sine, mislin da bi njoj doklen spi usta zašila. No, da me ne bi neki krivo shvatil – ja san odvavek na strane seh žen i baš zato mislin da su žene jače od bilo česa na ovomu svitu. Isto tako mislin da to saka za se mora dokončat, a na tomu se mora delat od kada se dite rodi. Recimo, ne njoj govorit sine leh ju vadit da nikada ne da straha na se i da se ča more muško, more i žensko. Pu mane doma kad se na zidu pojavi nekakova buba ale nema kobilica, to ne rešava ni Roditeljica, ni paron leh ja. Oni obadva vrišću, va najmanju ruku koda j’ na zidu krdo sloni ki će ih pregazit, a ja išćen hartu da blago pospravin na nju i odnesen na balkon. Ne zato ča san ja neš silno ni hrabra, ni spretna leh zato ča san od mićega naučena da saki problem provan sama rešit. Kad vidin da ne gre, onput zoven pomoć. A to van je se zato ča san va odrastanju kraj sebe imela prelipi ljudi, ne leh oni doma leh i oni va susestvu. Moje životne učiteljice bile su saka za se posebna – teta Vilka zadužena za moj duhovni život, majka Marica za življenje općenito, teta Ivka za bonton, a teta Kata za smeh i veselje. I vavek ih se rado sjetin, i ten svojen pokojnemi »afežejkami« čestitan Dan žen, sen drugen čestitan saki dan aš saki dan je naš ako tako odlučimo.