I tako pasal je i ta Tomson. Kako ča san i rekla – bilo j’ tresla se brda, rodil se j’ miš. Čovik je došal, otkantal, prošećal i dokončal da nan rabi Isus. Ja san na to leh rekla – kako komu. To su sada nekako preintimne stvari da bin se ja va to pačala. A ne bin ni va Tompsona aš mislin da se preveć njih pača va njega, a ja ne volin gnjetu, a još manje stat va redu. Zato, neka njega tamo, a mane simo i se najbolje mu va životu želin. Ono ča mane trenutno pojida ni to ki će bit novi direhtori rečkeh komunalneh poduzeći, mada bi me morda i trebelo, ni to ki će zamenit Ružića na čelu rečkoga KBC-a, mada bi me i to morda trebelo, ne pojida me ni to kuliko košta kilo babure na rečkoj place, ča bi me od sega nabrojanoga najveć trebelo pojidat, mane, verovali ale ne, pojida kako će pasat rečka karnevalska povorka.

Pojida me će bit daž, će južina, će bura, će sekire, će gole ženske z neba padat, će se to bit va jednoj veloj kombinacije, ale će bit neš peto. Zač me to pojida? Pa razlozi j’ puno, a saki se vavek češe tamo kade ga najveć srbi. A kako ja, ne znan ko desetljeće, a čini mi se i stoljeće delan te maškari, onput iman kronični maškaročeš. Dočin neki spomene maškari ja se ospen i počnen češat. Ni to alergija, to van je huje od toga – teški dermatitis.

Sako leto prohajan iste traumi. Prva je ta ča su si va povorke, a ja sedin va Novomu listu i gljedan na slikah kako se ti va gradu ludo provode. Poseden se na deset jutro i kljucan po tomu karnevalskomu prilogu do deset večer. Tuliko mi toga maškaranoga veselja i nemotarij pasa spred očij, a moja najveća zabava toga dana je kad zaokružin zadnju grupu na popisu aš to znači da j’ prilog od 32 stranice va roku finjen i poslan na tiskanje. Onput pogljedan na desno da vidin ako mi j’ kolegica Danijela još živa aš doklen ja kljanen, zijan i nemin, ona j’ jedna tako fina osoba da ju ni čut ni da diše.

Druga je ča vavek mislin da nećemo dospet, da ću neku grupu falit i da će se neš dogodit. I badava j’ ča bi da se ne znan ča dogodi se opeta bilo ok, ja vavek noć prvo te povorki sanjan prazne stranice. Treta je ča san njurgava i ča mi nikada niš ni dovoljno dobro, ča od sebe pa i od seh drugeh išćen savršenstvo, a maškari su se samo ne regula. Mislin da bi, ne jedan psihijatar leh celi psihijatirski tim imel posla z manun.

Neću već bit plačišiška, obrnimo se na valcer. Ni pet minuti da san čula kako j’ moja kolegica Alenčica muža našla jušto na maškaranoj maneštre i jote. Vidite kako pu nas te maškari čuda delaju! Zato, si ki bi se ženili nimaju ča mislet leh se odbavit i va povorku ale na bilo ča drugo ča j’ vezano za karneval, a Alenčice i njejemu odabraniku Luke čestitki i aplauzi na godišnjice. Najme ča Bog i maškara sprave to niki ne rastavi.

Gljedan malo va popis ovoletnje povorke. To j’ čuda grup, čuda maškar i čuda alegorijskeh kol. Zbilja su si truda dali. Čitan kako se te maski zovu i zamišljan ča bi se sega zad teh imen moglo skrivat. Da se razumemo, rečki karneval nikada ni bil politički obojen, kroz njega se vavel onako na pomalo i na fino provlačila ta kritika društva, ma on je odvavek najprvo bil za lipo videt. za se pokazat.

I ovo leto Rikun će prohajat čuda oneh ki bivaju va bajkami, pa čuda uporabneh predmeti, pa oni ki dohajaju z Afrike, Meksika i sličneh egzotičneh zemalj, malo oneh ki će maskun očešat svakodnevni problemi va gradu i prigradu, jedan Tomašević i jedan Tomson, a najveć oneh ki će z maskun zazvat proliće va svoj kraj. Vidin i da će jedna grupa imet točno hiljadu maškaraneh, sad će ale neće, jušto mi j’ svedno aš još tuliko nisan nema da bin jih šla brojit. A morda i bin da iman lazno, ma niman. Doć će v Riku na rečki maškarani dan i čuda »veleh glav«. Na humanitarnomu balu tancat će, kako bi jedna moja kolegica rekla – viđeniji gosti, ča će reć ambasadori, veleposlanici, princi, princeze i slično. Va Iskre će se kako i vavek zabavljat oni va piđamami, a va celomu gradu od sobote jutro do pundeljka jutro bit će jedan pravi maškarani kažin.

Si va gradu leh moja tiha Danijela i moja glasna malenkost va Zvonimirovoj. Sakomu prema zasluge, a vi z aegorijskimi kolimi, kod i vi Zamećani ki tradicionalno greste hodeć, fermajte na sekundu spred Novoga lista i pomašite dvemi sirotami ke sako leto huje pasaju od ijednoga pusta. Njega bar na Mesopust ale na Pepelnicu važgaju, a nas vešaju sako leto nanovo.