Ako vas zanima, od one noći kad san bila Čak Noris i Džeki Čen va jednomu, bila san dobra. Mirna kod bubica ka spi snon pravednika. To se baš i ne more reć za moju Roditeljicu aš sako jutro kad se stane govori kako ni niš spala, a i ono malo ča je da j’ to bilo – piši kući propalo.

Sad je drugi par rukavi ča se to ča govori ni istina aš ju je čut kako hrče do Crekvine na Kastvu i nazada. Pravin se da j’ to jušto tako kako govori i pitan ju da ča će reć da ne more spat, a ona odgovara kako ne bin ni ja da iman njeji problemi.

Tu malo stanen aš saki od nas najbolje znan ča ga žuli, a za iskreno reć, i prestrašila san se aš san mislela da ju neš boli, pa san onako potiho pitala – a, ča te to tako muči? Ona odgovara – a, ča me neće.

Telice, ča ne vidiš da j’ celi svit šal mater ženit. To se već ne zna ni ki koga, ni zač. Ljudi su lačni, ubijaju se kod muhi, boli na se strani, svadi se saki sa saken, mladi su objesni, a za stari nikoga ni briga.

Ni da ni va pravu, ma ja san odahnula aš – dobro je, leh je depresija. A ja znan jako dobro kako ju z toga stanja zivuć – tako da ju razjadin. A znan i ča ju more razjadit. Pitan – biš ti šla na Tompsona na Trsat. Ako biš, popeljat ću te.

Odgovara – da ča leh bin, od dešpeta sen aš ne volin kad neki nekomu neš zabranjuje. Pitan – pa zač onda ti mane celi život provevaš se zabranit osin disat. Ne seri, doletelo je kod z topa. Ja tebe celi život učin pameti, ma badava mi.

Eto, ki će koga ako ne svoj svoga. Nastavljan ja z Tompsonon i povedan njoj kako po fejzbuku gre neka pošalica va koj piše kuda će se pasat oni ki gredu na Tompsona, a parkiraju se na Delte.

Piše preko Parka oslobođenja, uz spomenik oslobođenja Rijeke od fašizma, do Titovog trga, pa uzbrdo Bulevardom oslobođenja, Šetalištem Ivana Gorana Kovačića…, do Trga Viktora Bubnja pa va Dvoranu Mladosti.

Još su neš dopiševali ma se već ne moren domislet. Ona me gljeda i govori – ča timi ne bi bilo lagje da su napisali da se na Tomsona v Rike gre putevima AVNOJ-a.

I nastavlja – ča ljuden neće se past napamet. Govorin njoj kako j’ to izazvalo vele polemike i zajedno podelilo ljudi, a ona govori kako j’ to očekivano aš da se pu nas odvavek si deli, a ča se nje tiče da bi ona sen ki parkiraju na Delte i gredu na Tomsona rekla da gredu preko Trsaškeh stub i Svetišta i da su začas va Dvorane.

Pitan ju ča bi to onput bilo – v Rike putevima vjere na Tomspona, a ona odgovara da je to jušto tako kako san rekla. Onput ju pitan da ča se njoj ta Tompson baš jako pijaža, a ona odgovara – a, zač mi se ne bi? Pristojan je čovik, poštiva stari ljudi, dela svoje delo i ni stalno po televizije da bi povedal pizdarije.

Napominjen joj da se njemu spočitava da poveda ono ča baš pu nas i ni dozvoljeno, a ona će – pu nas i mnogi drugi delaju štošta ča ni dozvoljeno pa nikomu niš. Niki jih ne razapinje ni ne ganja.

A ako j’ već tomu tako kako govoriš, postoje zakoni i kazni, pa ako ki koga ima za ča kaznit neka ga kazni, ma zabrana ni rešenje. I šlus. Ča j’ to znak da već nećemo o Tompsonu, pitan ju?

Ča se mane tiče moremo do jutra, tr ti ga poznaš, ja san ga leh na televiziju videla. Mama, ne poznan ga, leh san dva put š njin povedala aš mi j’ to delo, a treti put šla va Dražice na koncert aš moran sakamo nos zagnjest.

A, i on sakin poveda, besedi su s kemi je otela zaključit ovu temu, ma njoj nisan dala pa san dodala da se slažen š njun da niki nikomu ne treba niš zabranjivat ako za to ne postoje zakonske osnovi, ma da mislin da se okol toga ne trebe pojidat aš da Tomsonu i njegovomu »pastirskomu roku« ne more niki stat na kraj.

Misliš ti reć da smo mi zemlja čobani, pita me sa narogušena, a ja odgovaran – to si ti rekla, ja ne. Onput san brzo prehitila temu da ne izbije treti svjetski, pa rekla da će bit vagun ljudi na Trsatu i da j’ sen ki ne misle na koncert bolje ne poć ni blizu.

Odgovara – to me ne pojida, aš ne gren nikamo, ma jadna palenta onen ki tamo bivaju aš će bit napol vreštu. Još me pita da kuliko ljudi more stat va Dvoranu mladosti i ako ima dosti hitneh i osoblja aš da j’ na televiziju gledala kako smo po ten pitanju va deficitu.

Rekla san da j’ se pod kontrolun i da se ne mora okol toga pojidat, i dodala da ni ja ne gren na Tomsona pa j’ odahnula, nasmela se i pitala – si čula da j’ v Rike prodano šest karat za film o onoj Lopate.

Koj lopate, pitan ja, a ona će – telice, Lopate od Krampa. Ok, misija uspješno provedena, depresija j’ šla mater ženit.