Ako ste misleli da j’ premijer i mane dal šup kartu, grdo ste se prevarili. Tu san. Škerac na bandu, ma da su ga razjadili – su. Ne kladan nos tamo kamo mu ni mesto, baren se trsin to ne delat, no se mi se čini da j’ vranić zel šalu i da j’ AP odlučil reć bobu bob, a popu pop. Ne znan skuda san sad zivukla ovo aš teh bobi i popi od djetinjstva nisan čula. Pokojna teta Slavica, s kuda drugde ako ne z Višnjevice, ka se j’ strašno jadila kad bi ju neki zazval Slavica ale nedaj Bog – Slava, aš je njeje ime Vazmoslava, vavek je govorila »aha, sada će bit komu pop, komu bob«. Ja san zad nje kod papagalo vavek ponavljala »bobu bob, popu pop«, a da nisan ni znala ča to znači. Domislin se kad san jedanput va škole načinila nekakovu huncutariju pa me j’ pozvalo na odgovornost, a ja san stala, ruki prekrižila i rekla – aha, sada će bit bobu bob, popu pop. Učiteljicu Željku je to do suz nasmelo i ja san lišo pasala. A ja, vavek se rabi umet snać.

Kako će se snać si ovi posmenjivani, niman pojma, ma nekako mislin da će se puno prvo leh ča bin se ja. Intanto ov del ćemo finit z tri zaključki. Prvi je da vavek nekomu smrkne, a nekomu svane. Drugi je da niki ni nezamjenjiv, a treti da premijer pod hitno mora počet normalno jist i pušćat se te juhi aš lačan čovik je i nervozan čovik, da ne rečen onu izreku z jedne reklami. Mada, moran priznat, premijer ni nikada bolje zgljedal. Pršona i pol, rekla bi moja roditeljica.

Sad homo mest po vlastitomu privratu. Šušur je okol Kanala Ri. Jedino ča moren reć je da kolegami želin se najbolje i da se ča prvo skopaju z ove nimalo lahke situacije. Kako će se cela ta štorija finit, niman pojma i opće ne želin kalkulirat ma Rika zaslužuje da ima televiziju, i nadan se da će ju i zadržat. Pokojni otac od jedne moje prijatelice je užal reć da j’ selo bez crikve i škole kod žena bez cic i guzic, a ja ću leh dodat i bez gradske televizije. Naravno, ne bilo kakove leh prave. Se to sad na stran i homo i mi kod i celi svit na preuranjeni advent. Z leta va leto on dohaja se prvo, pa iman dojam da će doć leto va komu će se dva spojit i seh dvanajst meseci ćemo imet zvončići, jelvići, sobi i vlaki, a o punoj vreće dari da ni ne govorin. Već sada sako selo ima svoj advent, a do čera ta beseda va našemu zajiku ni ni postojala. Ne znan ča bi na se to rekle sveta Barbara i sveta Lucija, kod ni sveti Mikula, o Ivanu i Stipanu da ni ne govorin, ma nekako koda gube saku svoju svrhu i koda ih je neki preko student servisa zaposlil da adventiraju.

Ne pijaža mi se to. Baš ne. Mane ka san nekada jako volela ti blagdani, se mi j’ sada nekako bez veze. Mada ta advent dugo traje, puno duže leh je prvo, se skupa mi dava na jedan veli cirkus ki ima svoji klauni, a ne blagdani. Na, još nismo zaklali ni oneh par prasci ča su preživeli kugu, a već smo si va Božiću i Novomu letu. Butigi vrišću od adventa, ki god mejl da opreš si pozivaju na advent, paljenje blagdanskeh lampic, na ov božićni samanj, pa na on božićni samanj. Advent se j’ zavukal va se, od vrtića, preko knjižnic, škol, do bolnic. Jednostavno san ale ostarela, ale nisan konzumerist, a more bit i da san Grinčica.

Ono ča mi već gre na živci od instant adventa ki se nudi sagdere i sakomu je ta črni petak. Pa, ča baš se ča ne valja mora z Merike doć k nan i past na plodno tlo, kako se to uža reć. Črni petak ni leh po petku, to j’ sad već jako duga akcija i nudi ju saki. Samo čekan da jedan dan nekakov cimiter ponudi akciju za črni petak pa da recimo oni ki umru od tada do tada imaju 30 posto popusta na krematorij, na grobnicu, na hladnjaču, na venci i na se ono ča već gre uza smrt. Znan da van ovo zvuči morbidno, ma nemojte se iznenadit ako se i dogodi, pa recimo na radijo čujete – svima koji su odlučili umrijeti u vrijeme crnog petka, Komunalno društvo Smrtić nudi popust od 30 posto na ukop bez glazbe, a ukoliko odlučite posljednji ispraćaj uz glazbenu kulisu – popust je 40 posto. Naknadne reklamacije ne primamo.

I za kraj, skok z črnoga va roza. Sopeta su počeli kopat na sakomu delu i deliću grada, ča znači da ćemo za ko leto bit grad po meri čovika, grad z najboljun komunalnon infrastrukturon va ovomu delu svita. Volin kad san optimist. A vavek san, leh me tu i tamo prehiti.