Čera j’ bila glavna vijest da su dive orade na rečkoj place ceneje leh su sardelice. Prvo leh san na delo došla tu san informaciju čula od dveh, a na delu leh o tomu povedaju. Pa su neki šegavci kupili i dve kila aš šteta je ne kupit kad se splati. Ča se tiče place ne zahajan baš često tamo. Za razliku od pokojnoga oca ki bez place ni mogal zamislet život. Doklen je delal, placa j’ bila na redu po sobote, a kad je šal va penziju ako ne saki dan, onput baren saki drugi. Užal je reć kako se na placu ne gre leh po neš ča rabi telu, leh i po neš ča rabi duše, a to j’ pogovor. Domišljan se kako j’ jedanput rekal da j’ na place utaknul skoro svoju celu smenu z Luke i da su se baš lipo popovedali. Poznal je on i imel i svoji trgovci pa bi i š njimi poćakulal, tako da smo mi doma imeli pregled zbivanja ne leh v Rike i okolo Rike leh i puno, puno šire. Nisan poznavala si ti njegovi ljudi ma san poznavala njihove štorije. Pa san tako ki’vo dan kad san z delon finila na place, stojeć sa strane i gljedajuć ča se zbiva, mislela na oca i na te njegove štorije.

Svjesna toga da njegove ekipe na place već ni, gljedala san kako se pogovaraju neki novi ljudi, kako se sreću prijateli i ćakulaju, naslišala pogovor zmed kupci i prodavači i dokončala da j’ serija ista leh su »glumci« novi. I nekako j’ sega manje – i ljudi i robe leh ča j’ bilo prvo. Va ribarnice san se i nasmela aš je jedna gospa zad banka zijala, očito svomu stalnomu kupcu kako ima lipe, friške i jeftine dive orade, a on njoj je odgovoril – a, sigurno nisu pitome ako s tobun imaju posla. Eto, to j’ ta čar place od nekadanjih vrimena.

Moran priznat i da me j’ do suz nasmel jedan kulturni događaj ki se j’ zbil va galerije kraj place. Najme, mada sumnjan da će me glavni akter ove štorije zatuć, a onput i strt, pa se još i va rikverc vrnut, ma ja bin pukla da van ne povejen. Dakle, bila j’ sobota i va Kloviću j’ bilo neko dogajanje ko j’ imelo naziv Zajutrak. Za tamo j’ regrutiran jedan moj kolega ki inače baš i ne prati kulturna zbivanja, ma nisu mu ni strana. Intanto je on došal, po štreberski, još i prvo leh je dogajanje počelo i šal nutra hitit oko da mu ne bi ča promaklo. Hrpa umjetniki, pa i on glavni od cele štorije stali su spreda i ćakulali kad va jednom času, obrne se ta glavni i govori momu kolege – joj, pa ti mi jedeš eksponat. Kolega j’ jil bananu, a banana j’ bila eksponat. Srića od Boga da j’ čovik na vrime videl aš znajuć kuliko moj kolega more pojist, on bi čoviku pojil celu izložbu prvo leh bi bila oprta. Kako ja sakoga vranića čujen otela ale ne, o toj zgode va nezgode znala san se dočin se j’ dogodila i se si mislin ću bilo komu povedat ale ću mučat, kad – znate i sami – bin na rit ako ne bin na usta i sen san povedala. Ča j’ najbolje moj kolega, dočin je došal va redakciju, povedal je ča j’ načinil i si smo se slatko nasmeli.

To ča smo mi njemu to zapolne delali i ča smo mu sega rekli, bolje da ne znate. Ubili smo ga od zafrkancije, a kad je rekal da danaska sopeta gre na neko umjetničko dogajanje, a ča j’ još bolje – istoga umjetnika, jedino ča san mu rekla je – molin te, nemoj ovaj put pojist i eksponati i umjetnika, a on je odgovoril – ne brini, naučio sam kako se konzumira umjetnost. I opet smo se od srca nasmeli jer to njegovo objašnjenje zač je zel tu bananu i pojil ju, graniči z genijalnošću. Objašnjenje glasi ovako – što čovjek može pomisliti ako te netko zove na Zajutrak? Što drugo nego da te zove na doručak, pa ja doma nisam doručkovao. I kad sam tamo došao, vidio zdjelice s voćem na svim stolovima jednostavno sam uzeo bananu i pojeo je ni ne sluteći da jedem eksponat. Uistinu mi u tom trenutku nije napamet pala uloga mrtve prirode u umjetnosti kroz stoljeća.

A kad san ga ja pitala da kad je već pojil tu bananu i skoro čoviku šundral vas trud, zač ni načinil dva koraka i šal na placu kupit mu novu, on je dignul ramena i odgovoril – jednostavno se toga nisam sjetio. I ča da mu čovik na to reče. Baš niš. Sega vranića se čoviku na ovomu delu more strefit, i čula san na vlastite uši kako jedan fotoreporter njurga aš da on toga autora knjigi sigurno više neće čekat, a autor je bil mrtav već od sto let, i da su novinari intervjuirali krivu osobu misleć da j’ prava, ma da j’ neki skoro pojil izložbu – to nisan. Zato, si umjetnici ne bojte se loše kritike leh lačneh novinari.