Tramp, koga moja mat ki put zove Kramp, ni dobil Nobelovu nagradu za mir. Va Merike, med njegovimi pristašami zavladalo j’ velo nezadovoljstvo. Va medijih čitan ča se dele temi ki su namesto njemu dali Nobela Marine Korine Makado, pa zmed sega zrečenoga i napisanoga izdvajan – Steven Cheung, glasnogovornik Bele kući govori »Trump će nastaviti širiti mir, zaustavljati ratove i spašavati živote. Ima srce humanitarca i nikada neće biti osobe poput njega koja može pomjerati planine snagom svoje volje«. Ben ti miša, nisan znala da to oni govore o onomu sjevernokorejskomu precjedniku komu se ovoga časa ne moren domislit imena, mislin da je Kim Jong – un, o Obeliksu, o drugu Titu, ale nekomu sličnomu. A kada san još pročitala da j’ Trampova administracija uputila i direktnu kritiku Norveškom Nobelovom komitetu, ki deli nagradu, malo san se prestrašila da ga do druge dodjeli Tramp ne kupi, anektira ili ča drugo.

I tako namaljan ja, namaljan o Trampu, nagrade i miru, pa pitan kakova j’ ta ista ča j’ maznula nagradu Trampu. I iman ča čut. Kolega Gromičan 2, aš Gromičan 1 je jedan i jedini – Dražen Herljević, odgovara – huja leh je on. Srce Isusovo, mislin si ja, ča more bit neki huji? A kako Brnelić zna jako puno o svjetskoj politike i političaron, o odnosimi va svitu i sega vranića na globalnoj političkoj scene, mane ni ča sumnjat leh ča navadit. Intanto kad mi j’ rekal ka j’ ta ista gospa ka j’ dobitnica nagradi za mir, malo mi j’ bilo žal Trampa, ma koliko to bilo grdo za reć i za čut. Ja san mislela da j’ pu nas najveći šlamperaj, kad vidi ti vranića ni ovi od Nobela nisu cepljeni protiv njega.

A kad smo već pu cepljenja, leh da vas podsjetin da j’ počela sezona cepljenja protiv gripi pa ki j’ za jedno cepivo, ni mu ča puno mislet leh mu je poć. Gren ja? A ne, jedan jedini put san se cepila i dobila san ju pa san odlučila malo pauzirat. Govore mi da j’ sigurno bila lagja leh bi bila da se nisan cepila, ma slaba vajda od toga, mane j’ bila huja da huja ni mogla bit. I pred malo san imela neš sličnoga, aš to danas ne znaš ča imaš i ma kuliko testi da kupiš, si ti pokažuju da niš nimaš, a tebe j’ loše za ponemet. Nisan bila pu dohtorice aš leh joj još ja rabin. Je pasalo? A ki put mislin da je, ma kada se zakašljen i kada zašmrčen, shvatin da j’ još vavek na odlasku.

I sada već nećemo o boli. Sada ću van povedat da mi j’ ki’vo dan z radnoga okruženja prošal i kolega, i prijatel. Serđo mi j’ bil dva va jedno. Prošal je pokle 32 leta tri meseca i šest dan kuliko j’ provel va Novomu listu. A razlog tomu da pušća i sebe i fotoaparat na miru je jušto to ča mu j’ bilo dosti potekivanja okolo. Jednostavno se j’ zaželel mira i spokoja. Bilo j’ to jedno dirljivo opraštanje, ma kako j’ to njegova odluka, ka san ja da mu proturječin. Uostalon, kolege već ne moramo bit, a prijateli smo i dalje. I nemojte me pitat kamo j’ šal aš ne znan. Ja san van kod noj – se ča ne želin znat, jednostavno ne znan. Kad neki o tomu počne govorit, rečen – ne slušan, ne zanima me. Kad me pasa – saznan.

Nego sad imamo drugi problem. Najme, kad god neki gre ća z našega maloga kolektiva, mi skupimo neki soldi i kupimo mu neš. E, za to delo imamo i utjerivačicu milodara. Ča mislite skuda je? A odkuda ako ne z Raba. Ta bi te natirala da se pu kamatari zadužiš, aš moraš platit. I još ti broji. Ako ni zadovoljna z donacijun reče ti ki je najmanji iznos pa te još i posrami. Si oni razbijači z filmi moru se skrit pred Ori. A kada skupi soldi, e, onput je živa muka ča kupit. Zanimljivo da pu nje nikada ne fali, leh je viška. Sad već dva dana pohaja zamanun i zija – imamo tuliko i tuliko, ča ćemo mu kupit. Ča kupit onomu ki ima se, odgovaran ja, a ona me leh probode pogledon i odgovara – niki nima se pa te molin da misliš. I tako ja mislin, mislin i mislin, a već va startu znan da niš pametnoga neću smislet, odnosno da će bit kako Rabljanka reče. Jedino ča san uspjela je fermat ju da mu kupi pasa, aš čovik ima mačka Otta i to ne bi bilo lipo naspram Otta. Ni još jednu mačku, aš ni to ne bi bilo lipo. Ni maslinu aš ki će ju transportirat do Prvića, a bome ni biljet za javnu kuću aš bi morala poć š njin pa ako mi se zapijaža – odoh i ja.

Za Nobelovu nagradu ipak nismo dovoljno skupili.