Ki ne ume donest pravu odluku – ne ume i tako mu je od kada se rodi doklen ne umre. Ki neće da posluša šegaveji od sebe, ni ni zavredil da mu život da novu priliku. Tako j’ mane moja roditeljica ki’ vo dan mašila. Naravno da se j’ sa ta njeja mudrost vezala za me i da san ja ta ka ne ume samoj sebe nać pravi put, a uza to još i neće da posluša onu ka j’ šegaveja od nje, a se njoj va življenju najbolje želi. Znate i sami koga – Nju. Od sega njejega mudrovanja priznan za istinu jedino ono zadnje, a to je da mi se va življenju najbolje želi, ma ono se prvo san zajedno pobila. A zač smo nas dve opće došle na ov pogovor? Zato aš je to tradicija. Sako leto kad je školanimi poć va školu, mi vodimo ovakov ale sličan razgovor. Najme, ona mi nikada neće oprostit ča san tako lipo zanimanje kod ča j’ profesor hrvackoga zamenila za ovu, citiran – šporkariju z kun se bavin i ku joj još i doma nosin. To doma nosin se odnosi na to da ki put i z domi delan. Da j’ korona potrajala, ona bi me bila z kući stirala.

No, vrnimo se teme. Dakle, moja Ona ima uši kod zec. Ja telefoniran i z prijatelicun komentiran situaciju va hrvackomu školstvu, ča će reć da j’ danaska lagje nać dobroga majstora, a to j’ znate i sami – nemoguća misija, leh je školan popunit kadar. Govorin ja da j’ va školstvu sad kod va nogometu – ravnatelj mora imet skauti ki okolo išću i kradu talenti, ča će reć učitelji i profesori. To su sakramenski transferi. Danas bit profesor matematiki, fiziki ale kemije, biologije i slično, to j’ bit kod Luka Modrić. Si te išću, a ti dirigiraš uvjeti.

Kada san finila razgovor, moja roditeljica kreće – i ča san ti ja govorila, i ča san ti savjetovala, ma ti nećeš leh po svomu. Ja ću delat kod novinarka, ja ću menjat svit, ja ću ovo, ja ću ono. I ona trubila od tvoga pokojnoga oca ka ti j’ vavek se pušćevala, ma najraje bin vas obadveh šćepala. Njega već ne moren aš ga ni, ma tebe još vavek moren. Pušćaj malu da gre za svojen snon! Bonđorno! Z kakove dve bedačine san živela, dobro j’ da san još vavek živa. Najšegaveji dva na svitu! I ča sad – njega ni, a ja se moran saki dan kad od dela dojdeš doma borit z tvojun nervozun. Ja, mislela si da ćeš vavek bit mlada, da ćeš moć, da će živci bit kod najdeblji konopi. Da san prosta, ča nisan, valje bin ti rekla česa pokle česa ni, ovako ću ti leh reć – sad ti j’ kasno da se kaješ aš već niš ne moreš promenit. Da si vadila decu, bi te se ki put ki i domislel, a ovako kad projdeš va penziju, koda te nikada ni bilo. Pozabit će te kod ča su pozabili i si oni drugi ki su delali to ča delaš. Zela j’ zraka i pitala – ala reci, san ja va pravu.

Mučala san jedan sled, a onda njoj rekla – va jednu ruku si, va drugu nisi. Naravno da j’ zajedno skočila – a va čen to nisan? Va jednoj jako bitnoj stvari, a ta je – ja volin svoje delo, nervozna san ne od dela leh od tvojih prodik, živci bi mi da san delala va škole još prvo prošli, i ono najvažneje je – da se opet rodin, se bi bilo isto. Ono va čen si va pravu je da se profesori i učitelji si školani domišljaju, prva ja, nekeh po grdomu, nekeh po lipomu. Novinari nekako padu ljuden va zaborav, ma novinaron ljudi ne padu i do kraja života ako ih mozak služi moru vrtet štorije i štorije od sega i sačesa ča su va životu delajuć pasali i ljude ke su upoznali. Gljedala me je koda san malo munjena i niš joj ni bilo ćaro. A kako da ja njoj sad objasnin da saka budala ima svoje veselje, da mi nikakova škola, ni zbornica ne more zamenit cestu, ljudi, događaji, ono veselje kad svojemi slovimi nekomu pomoreš, ale nekoga staviš na mesto ko mu »po zaslugah« i pripada. Kako da njoj rečen da se najveć nasmejen i najbolje osjećan med ovakovimi kod ča san i sama. Zato san ju leh zagrlila, ča mi baš i ni običaj i rekla – imaš to ča imaš, i pomoći nima. Tr da se ti nisi odlučila za me, da si zibrala nekakovu drugačju rodit, sad biš naslišala od škole i školani, a ne kako j’ moj kolega Bobo došal kod glavne urednice i rekal: »Miš mi ne dela, molin te pobrini se da dobijen novoga. Uspravnoga!«

Nasmela san ju do suz, još san njoj i sladoled dala, tako da san jedno vrime po ovoj teme na miru.