Na znanje – prvo leh san šla pisat ov naš kantunić, šla san pu braniteljih i pojasnila ča ću pisat, zač i kad. Nisu imeli nikakoveh primjedbi, tako da ih vi ki mislite čitat ne morate niš poć pitat. Bolje j’ ovako leh pokle cela kumedija. Ako me pitate koga od njih san pitala, odgovor glasi – seh ke poznan, a poznan jih fanj i to po celoj Hrvackoj. Tema današnjeg pogovora su dve štorije z života. Prva dohaja z Gromišćine, točneje z Hrastenice, a druga z Gorskoga kotara, odnosno z Općine Brod Moravice, selo Velika Draga. Najprvo gremo na Gromišćinu. Ki’vo dan, jušto da ću se poć odbavit za na delo, zvoni mobitel, pogljedan – piše Edo Žeželić. Kako ja toga čovika jako volin i jako štiman, pušćala san odbavljanje i javila se. Mislela san da me zove aš opeta ima nekakovu akciju. To van je on Žeželić ki j’ iniciral Mlikaričin put, on do Kalići i šterne, on ča j’ okupil si Žeželići – veli i mići. Ma ov put ni bilo niš toga tipa, govori on mane:

– Molin te kad budeš pisala on svoj Z kamika i mora, napiši da san ja – Edo Žeželić – danas najmanje tri puti ispal mona.

Sa va čudu ga prekinen i pitan – ma Edo, za Majčicu Božju, ča se j’ dogodilo.

A ča se ni, govori on mane i štorija kreće:

– Znaš, ja ti stalno po umejkih, šumah i ravnicah pobiran smeti zad oneh ki jih pušćivaju, pa kad nakupin teh boc, spravin ih i gren odnest na povrat ambalaži. Tako san načinil i ov put, pa mi j’ najprvo parona rekla da san mona, a onput su njeje besedi i potvrjene. Najprvo san čekal va Metrou ne znan kuliko vrimena da bi mi rekli kako ne zimaju staklene boci leh plastične, pa san se razjadil i skupa z svojun ambalažun šal dalje – va Interšpar na Kukuljanovo. Tamo red za ponemet, stal san na kraj i čekan, čekan… Z onoga hodina niki ne zihaja, gren malo pošpijat ča se dogaja, kad iman ča videt. Nutra jedna gospa hita boci va škuju, a stroj njoj jih hita vanka. Zajedno mi j’ bilo ćaro da neš krivo dela, rinen vrata z namjerun da ću joj pomoć. Tumačin joj kade greši, a ona kod ona ista z pjesmi od pokojnoga Iva Brdara ka j’ molitvenik držala poznopak i načinjala se da moli, pa kad su njoj rekli da ga obrne aš da ovako si znaju da ne ume čitat, odgovorila da ki zna čitat, zna sakako – i ovako i onako. Dobil san takovu zajikovu juhu, da j’ to za ne verovat. Pokril san se z ušijami i prošal vanka. Od jada san su anbalažu pušćal, a onput od paroni dobil još jednu tiradu, da mi j’ za leto dan tirad dosti. Pomiril san se z tin da san mona, ma žal mi je ča j’ ona gospa ča prodaje Ulične svjetiljki spred Lidla, ov put ostala bez biljetića. Najme, kad vrnen ambalažu njoj odnesen biljet. Eto, moral san ti ovo povedat aš zbilja se skupa ni normalno.

Doklen se j’ on žestil ja san pucala od smeha i na kraju mu rekla – Edo, ja znan da ste vi sad jadan kod pas, ma oprostite, mane j’ se to skupa za pocurat se od smeha, a najbolja mi j’ ona gospa ka riva nutar, a to ča riva njoj se vrnja. Ča se pak tiče ženskice ka ni dobila biljetin, to van je Edo, tako. Vavek postoje i vavek će postojat kolateralne žrtvi.

Onput smo se lipo pozdravili, ja san dala pozdravit i gospu paronu, a ča se tiče bit mona – ako neki zna kako j’ to, to znan ja. Komotno mi to more bit drugo ime.

A sad gremo va Gorski kotar. Čitan da su pokle Praputnjaka i Velike Drage postale jako popularne va svitu. Najme, odotamo da j’ prapra nono od Travisa Kelcea. Za one ki ne znaju ki j’ ta isti, on je zaručnik od Taylor Swift, a za one ki ne znaju ni ka j’ ona, ne moraju ni znat. Intanto, ta prapra nono od Trevisa da se j’ va Velikim Dragama zval Juraj Štajduhar, ma va Merike je postal Džordž. Se j’ to na Radio Rike otkrila Meri Jurković, rojena Štajduhar, čigovi su stari bili susedi od oveh stareh od Tejlorinog zaručnika. I sad gospa Meri govori da bi bilo jako lipo kad bi ta šesni i slavni par došal va Gorski kotar, a ja bin joj najraje bila rekla – leh ne kod Maradona ki j’, kad su mu rekli da mu j’ porijeklo z Praputnjaka, prvo pital – a, imam li pravo na kakovo nasljedstvo?

A kad smo već pu nasljedstva, pitan ja ki’vo dan roditeljicu, ča će mi va teštament pušćat, a ona odgovara kako j’ vavek oprta za dijalog. Bit će da preveć nasliša televiziju. Morat ćemo to malo reducirat.