Imate vi kućnoga ljubimca? Ja ne, ako ne računan mat. Najme, ov put nećemo ni o tepline, ni o mrzline, još manje o Trampu, Putinu i Zelenskomu, bome nećemo ni o cenami benzine ke su sad gore, sad dole, još manje ćemo zbrajat i razbrajat strani i domaći turisti. Bavit ćemo se z blagon ko imamo doma. Zač? Zato aš je ovo šetemana od kačak!

Kamo god da se obrneš, čuješ ale pročitaš neš od teh gmizavci. Gremo najprvo od onoga najhujega – ujedi. Najme, dočin čujen da j’ nekoga kaška ujila, srsi me pasaju aš znan kako j’ to kad ti spred očij poskok uji nekoga.

Va momu slučaju parona. Brižan je tek došal z ratišta va Like i šal va Krnicu odmolat motor na barke od barbe. Zavukal se spod nje i to z glavun nutar, a beštija hop za ruku. Srića da ga ni za glavu aš bin ja već odavno bila udovica. Onda je još va pulskoj bolnice postojal odjel za ujedi od takovog blaga.

Mislin na kaški, stršljeni, črne udovice, čeli, osi, škorpioni i slično. Ma ča j’ bolje kada su si serumi ki su imeli poslali na ratište, pa j’ moj paron dobil ono ča su imeli – serum komu j’ stekal rok trajanja.

Dobar je bil i on, aš eto, živ je. Šetemanu dan je bil va bolnice, malo mu j’ fasovala jetra od toga seruma, ma su se i on i ona relativno brzo refali. Ča j’ bilo z poskokon?

Niman pojma, jedino ča znan je da kad je spuznul spod te barki, žvelto odgmizal. I da stvar bude bolja, paron ki se j’ do toga ujeda jako bojal kačak, ih se od onda ne boji, a ja ka san jih na putu od škole preskakala aš su se sunčale jušto na momu putiću za na Višnjevicu, prestrašin se ako jih i na slike vidin.

Od šoka san valjda dobila strah, ma san i navadila da ni bitno si na plaže, va planine ale na polju – beštija nikada ne spi. Tako doklen su se si čudili kako j’ brižnoga malčića na plaže okol Puli ujil poskok, mane to opće ni bilo čudno.

Srića od Boga ča j’ dite živo! Onput san čula da j’ bilo još ugrizi na pulskomu području, ma da j’ i na Kastafšćine va nečigovomu dvorišću viđen ne jedan poskok, leh više njih. Moja mat tvrdi, da j’ ovo leto od kačak i da to ni niš neobično. Kako se pu ljudi dogodi bejbi bum, tako to biva i pu kačak. Pitan da otkud njoj to, a ona odgovara – iz života.

Iz života je i ovo ča se j’ dogodilo v Rike na Škurinjah i va Zagrebu na Kajzerice. Ča se j’ dogodilo? Pa, niš strašno – leh je vlasnikon pobigal piton. Zaspraven, zagrebački je pobigal, a rečki se j’ leh igral z gazdaricun na skrivaljca.

On od metropoli je odlučil malo odgmizat ma ga j’ va vrlo kratkomu roku i ne dugo od doma ćapal čovik komu j’ delo lov na kaški.

Ov pak naš, nikamo ni zdimil, leh se j’ doma zatukal va nekakov kantunić pa j’ gazdarica mislela da j’ pobigal kroz poneštru. Vela većina korisniki društvenih mrež napeto j’ pratila ča se zbiva z ta dva gmizava huncuta, a mnogi su, kako to obično i biva, va komentarimi bili fanj bezobrazni.

Leh san čekala kada će počet obračun zmed ustaš, četniki i partizani, aš da neki napiše »danas je sobota«, već bi se neki našal spomenut oni maloprvo spomenuti.

Ono ča j’ mane va celoj toj štorije najveć zanimalo je – ča susedi misle o semu tomu, aš da mane sused za kućnoga ljubimca ima kašku, tarantulu, tigra, ale kakovo drugo opasno blago, me par da bin se odselila.

Ne bi mi bilo drago ni da mi vrata do stana neki ima pit bula, a kamo ča takovo. Ja, znan da će me sad si špotat da san ovakova i onakova, a ja san leh iskrena i strašljiva.

Pitan mat da ča ona misli o tomu, a ona širon oprteh očij pita – ča i pu nas ljudi drže kaški doma, ja san mislela da to leh delaju oni ludi Merikani. Kuliko j’ ona strašljiva, mislin da zna da neki va susestvu ima kašku za kućnoga ljubimca, odselila bi ne z kvarta, leh z grada. Njeja teorija glasi da j’ blago za bit vane, a ljudi va kuće.

Jedino ki suživot ona tolerira je on zmed čovika i tića, i zmed čovika i maški. I za pasa je uvjerena da mu j’ va stanu bit mučenje, kamo ne za kašku. A sav ov pogovor je mane dal super ideju, kad god mi mat zapili po mozgu, znan š čen ću joj zapret usta.

Leh ću joj reć da san odlučila kupit terarij i klast va njeju kamaru. Ne moran njoj ni obznanit ča san naumila va njega stavit. I prazan bi njoj zaprl usta. Ekola, zbilja ni sako zlo za zlo.