Majko Božja Trsaška, molin te – čuvaj, pomozi i načini se ono ča misliš da rabi kako bi nan sen bilo bolje. Tako nekako je moja roditeljica skljepala molbu Gospoje aš da ako ona ne pomore – celi će svit poć mater ženit. To su njeje, kako bin ja rekla – molitve za po doma aš već ohoho let ni bila na Trsatu.

Ako ćemo pravo i prvo ne na taj dan.

Najme, običaj seh nas od sel okol Bakra je bil poć Majke Božjoj Trsaškoj na svetoga Roka, ča će reć drugi dan. Zač? A, iskreno – pojma niman, kod ča niman pojma ni zač smo hodili na Beli pundejak, a ne na Belu nedelju.

Još ta pundeljak razumen aš smo hodili na Belu nedilju na Križišće, ma zač na Trsat drugi dan po Veloj Gospe – e, to ne znan.

Najprvo da ste bili komotni, uža mi reć paron, ma nekako mislin da to ni bil razlog. To ča se ja od djetinjstva odbavljan poć hodeć na Trsat na svetoga Roka, a još vavek nisan to načinila, to j’ drugi par rukavi.

Kad san imela velu volju i hitre nogi, nisu me pokojna teta Vilka i pokojna teta Marica otele zet aš da san premića, doklen su te nogi još bile va motu, nisu bile va motu nogi od Vilki i Marice, a pu mane j’ volja nekako šla na ferije, pa zadnjeh desetak let saki put kad se gre, ja iman neku škužu.

Nekad zaspraven, a nekad baš i ne.

Recimo, ovo leto mi je škuža da mi j’ prijatelica Gordana s kun se spravljan na to hodočašće još vavek negdere va belomu svitu, a poć sama – to ne bi bilo va redu i vizavi nje, a ni mane. Tako da i ovo leto – niš.

Se ima svoje vrime, pa ćemo valjda jedanput i Gordana i ja hodeć od Krasice na Trsat – Gospe. A sen onen ki će noćas od Zlobina, Hreljina, Praputnjaka, Krasice, Škrljeva, Svetoga Kuzma i Dragi put Trsata, želin lipu i svetu noć.

A na Trsatu, kod i sakoga leta – ljudi od sih kraji. Cele familje. Teplo za ponemet, ma ako se raneje staneš, i raneje dojdeš va Svetište – se j’ nekako lagje i mirneje.

Ja, ka baš i nisan od ranoga stajanja, na Velu Gospu se stanen zorun i gren. Tr pokle moren spat ako baš ne moren zdurat, a gnjetu na ta način zaobijden.

Kako nisan od oneh ki moraju bit vavek tamo kade je neki važan, a na Trsatu su čera na maše na deset bili si važni i prevažni z političkoga vrha, ne moren van baš niš reć od toga, aš ja nisan bila. Jedino ča san pročitala, a imela i čut, je to da j’ Uzinić briljiral.

Njega jako volin, pa san more bit i pristrana, ali neće bit aš ne bi mu pokle propovjedi ljudi pljeskali da nisu istoga mišljenja kod ča san ja, a to je da Rika ni mogla dobit boljega božjega pastira leh je dobila.

Ča se tiče samnja i ostaleh popratneh dogajanji, niman baš ča puno za reć osin da se ni znalo ki j’ bil pospaneji, oni ki su štandi kladali ale ja ka ih opće nisan abadala. Kuliko su oštari zaslužili i kakove su bile cjeni, niman pojma aš je moj put bil ciljani, ča će reć da j’ finil brzun brzinun, ma nekako mi se čini da će sopeta bit po staromu – oni ča prodaju će reć da su malo zaslužili, a oni ča kupuju će reć da njin je se bilo preskupo.

Jedino ča san čula od oneh ki su bili kašnje, je da ni baš bilo gnjeti za ispovjed kako j’ užalo bit. A more bit zato aš su ljudi postali bolji pa manje greše, a more bit i zato ča su sami sebe spušćali ki skalin pa neš ča j’ prvo bil greh, sad već ni.

Ča vi mislite?

Neki govore i da j’ bilo manje ljudi leh ih je bilo prijašnjeh let. Ne znan kuliko je istine va tomu aš ja ovo pišen na pet zapolne, a do k večeru se situacija altroke more promenit. Ki stupanj će bit manje va zraku, a na trejset je nekako lagje leh je na 37 kuliko j’ bilo okol ure-dve.

Sad malo mislin ću van povedat ča j’ jedan komentiral kad san rekla kako san čula da na Trsatu ni tako jako ljudi, ale da premučin. A znate kakova san, pukla bin da ne rečen.

Ta isti to objašnjava činjenicun da ako Gospu moreš videt na hipodromu, ni ti poč poć va Svetište, a mi da smo ju mogli videt na dva. E, pa ča se ljuden neće past napamet.

Ja san sled po starinski pa raje gren va crikav leh gljedan va nebo. Te Gospe od drona me se baš nisu jako dojmile, mada niman apsolutno niš protiv.

Ki veruje, Majku Božju more nać kade god, ma ju najprije mora nać va samomu sebe.