Pasanu j’ šetemanu bilo sega vranića. Ni bilo dosadno. Ono ča su si z nestrpljenjen čekali se i dogodilo, i Bogu hvala lipo i OK pasalo. Ča bi moja mat rekla – silna sila va Zagrebu. Dakako da povedamo o mimohodu koga j’ ona ispratila od prve do zadnje minuti, da bi mi, kad san z dela doma došla, mogla povedat ki j’ bil, ki j’ ča rekal i ča j’ bilo. Intanto, roditeljica je bila jako zadovoljna z onen ča j’ videla, a sled i već zato aš je bil jušto na njeji 89. rojendan. Rekla san njoj da j’ mimohod zaspraven bil njoj va čast pa j’ hitila papuču zamanun. Jedino ča njoj je malo zapačilo, a ja ne znan je to za spraven bilo tako ale njoj je promaklo to ča med povjesnemi postrojbami ni bilo ni Gromičani, ni Bakrani. I ja – žal njoj je bilo i ča ni bilo jahači, kako bi ona rekla. Kad san njoj pojasnila da jedni nisu bili na prove pa su eliminirani z dogajanja, a Alkari da nisu imeli lazno aš se pripravljaju za Alku, rekla je – onput dobro i dodala da morda i bolje aš bi se brižni konji mogli i prestrašit od pirotehnike, avioni, tenki i slično. Naravno da mi j’ rekla da ja imalo vredin da bin bila tamo, ma nisan bacilala aš njoj je bil rojendan pa ne bi imelo smisla svadit se.

Toliko o parade, a sad o turiston. Grad ih je pun. Hrvacki moreš čut jedino ako sam sobun povedaš. Si mili jeziki lamataju okol tebe, za puno od njih ni ne znaš s koga dela svita dohajaju. A da moja roditeljica vidi neke od teh, rekla bi – majčice mila, ča ova sirotinja tu dela. Raskosmani, blatni i va najveć slučaji polugoli. Tuliko njih va kasu i va kratkeh gaćah nisan videla ni na porno filmu, a kamo va nekomu gradu, kuliko ih je za videt po Rike. Ča bi rekla moja prijatelica Baukica – dobro da ih vidim da se takvi šeću u Baški, ma po Korzu… I ima pravo, kod ča imaju pravo i si oni čelnici gradih po Francuskoj i Italije ki su zabranili takovo pohajanje va svojeh mesteh. Red se trebe znat, a ne da ti kod pu nas roštilj načine nasred plaže i još se čudon čude kade j’ problem i zač se to ne bi smelo. A naše bedačine na plaže leže, gutaju dim, trpe i muče doklen god moru zdurat, a onput prvi ki pukne zove policijoti. Ma, doklen pukne, roštilj je već gotov, a turisti siti i napiti. Još ta roštilj nekako, ma kada ti kampiraju spred vrtića kod ča su oni na Vežice, e onput se zbilja pitaš ki j’ ovde nem. Ima i oneh ki provaljuju va auto leh da bi nutre prespali, aš zač bi plaćali hostel kad moru za pesplatno spat. Ča si ti ljudi kladaju va glavu, ča misle da j’ Hrvacka Diznilend? Ma, doklen jih po žepu ne opališ, posrat će ti se na glavu i mislet kako su i to platili skupa z letovanjen.

No, se ovo nabrojano još nekako, ma ono ča san videla na društveneh mrežah, e pa to san mislela da nikada va životu va ovomu gradu neću videt. Ča? Pa, spred Konta, va pol bela dana, na klupice spod kostanji, a spred terase od kafića dva od njih su se škufetali. Ja, dobro ste čuli. Na tri zapolne. Morda ki minut pokla. Oni va delu, a ni metar dalje od njih nekakova gospa na terase pije kafe ale ča ja znan ča i ima pornić va živo. Kade j’ stal onaj ki j’ se to snimal, niman pojma. Ni ki j’ zval policiju isto niman pojma, ne znan ni su ovi odbavili to ča su delali do kraja ale su ih policijoti prekinuli va pol dela, jedino ča znan je da su privedeni i da su dobili deset dan zatvora. Srce Isusovo, i blago zna red, a ljudi ovakove šporkarije delaju. I sad jedan moj kolega govori – a, ča, ljuden je došlo. Ma, ča njin je došlo? Njin je va mozgu pukla i ona žičica ča njin uši drži va praznine va koj normalni ljudi inače imaju mozak. I zbilja mislin da njin rešt neće puno pomoć, ma da su dobili trajni izgon z Hrvacke, aš nekako mislin da to nisu naši ljudi, i da su jih opalili po takujinu, dobrovoljno bi postali impotentni.

Nakon sega ovoga apsolutno shvaćan Francija Blaškovića i njegovu Ligu za boj protiv turizma. Kako bi rekal moj prijatel Herljević, i leto, i turisti trebe zakonom zabranit. I šlus! A mojoj prijatelice Mirjani Grce, mojoj Mije, želin sretnu i dugu penziju, mada njoj neću tako brzo oprostit ča j’ prošla i pušćala me samu. Kad Prodana ni, onput smo on stroj za tiskanje ča stoji na recepcije i ja najstareji va Novomu listu. Avah je mane.