Ala najprvo da vidimo ča se nisan, a otela san načinit ovu šetemanu. Najprvo ono ča san zbilja jako otela, a radi dela i radnoga vrimena ni bilo i do kraja šetemani neće ni bit šansi, je poć na Dani Krasice. Spod kući mi je veli šušur, a ja ne dospenen nanke ga čut, a kamo videt.

Intanto iman izvješće da j’ bilo jako veselo, a da će bit još i veseleje. Takovimi leh rečen – ne kladajte mi sol na ranu. Ako već nisan dospela na Majku Božju Karmelsku na Krasicu, mislela san da ću morda dospet na Majku Božju Karmelsku va Kuterevo kade su slavili tristo let od dana kada su načinili crikav. Velo slavlje su imeli, KUD Dangubice je dopeljal i gosti – folkloraši z Ličkoga Lešća, Benkovca, Obrovca i ča ja znan skuda se ne. Povedaju da j’ bilo veselo, da se j’ kantalo i tancalo do jutra i da se j’ i vol pekal i delil. Medvedi z azila da nisu uložili nikakov prigovor i da j’ se bilo jušto kako j’ trebelo bit. Otela san ja nos zagnjest i na Pulski Film Festival, ma – bonđorno. I ovaj je pasal prez mane. Jedino ča san videla i to na televizije je dodjela nagrad. I nisan bila baš impresionirana š njun. Ne mislin na nagrajeni, aš ako neš nisi gljedal ne moreš o tomu ni povedat, leh na samu dodjelu. To j’ bilo se nekako zbrda zdola, koda san ju ja režirala. A morda san bila leh loše volji doklen san to gljedala.

Ono na ča nisan mislela poć aš nisan nikada pa ne bin ni sada, ma me par da j’ lako moguće da neće poć ni oni ki su komać doškali da gredu, je koncert Lepe Brene na Krku. Najme, kako čitan po portalih i slično, branitelji su protiv da se ta koncert održi, pa sad će se ale ne, hodi ga znat. Niki me ne pita ča ja o tomu mislin, ma ću sedno reć – mislin da niš ne treba zabranit ako to neš nikoga ne ugnjetava. I slažen se z predsjednikom Milanovićen ki j’, da skratin, rekal – da j’ zabranjeno voće, najslaje voće. Gljedan po sebe – se ono ča mi j’ va djetinjstvu i mladoste bilo zabranjivano, vavek me j’ vranić tental da baš to načinin. Da mat ni rekla da neš ne smen, vela j’ vjerojatnost da to ni ne bin načinila, ma dočin je ona izrekla zabranu, bez mislet bin ja jušto suprotno napravila. Tako da san mišljenja kako zabrani nose kontraefekt. I ča nan sad rabi zabranjivat tomu brižnomu Bajage nastupi? Pa, njemu takoreć ni radna dozvola ne rabi aš je čovik rojen va Bjelovaru. Kuliko ja znan, on za se ovo vrime ni načinil ale rekal niš protiv Hrvatske, a i do sad je sto puti nastupal va Hrvatskoj. Ča se j’ sad najedanput dogodilo, ni mi ćaro. Od cele te Bajaga štorije jedino ča se pu mane promenilo je da još jedan sled više volin Antonija Pušića ale Ramba Amadeusa, a jako ga volin, ki j’ rekal – ako Bajaga ni dobro došal va Solin, e, onda neću doć ni ja. I tako j’, mada živi od koncerti, ta isti Rambo Amadeus pokazal da j’ kolegijalan i da j’ pošten čovik ki nima glavu leh za orehi tuć. I sad dosti o zabranami i zabranjivanju aš ću ja samu sebe zabranit pa kud puklo da puklo.

Homo mi malo mest po vlastitomu privratu. Gradonačelnica Riki imela j’ presicu. Niki ov put ni smjenen. A mi smo skoro oprli kladionicu ki je sledeći na redu. Neću van reć ki se j’ se našal va konkurencije, leh ću reć da j’ na jedno ime puno njih tipovalo. Kad ono niš – gospa Rinčić nan je pokazala da ju se ne sme nikada zimat zdravo za gotovo, odnosno nogometnen rječnikon rečeno – Rinčić 1, oni ki misle da se znaju 0. A kada smo već pu nogometa, onput se moran pohvalit da san z materun odgljedala fanj utakmic od ovoga ženskoga nogometnoga prvenstva. Bilo nan je obadven jako zanimljivo. Ne sumnjate valjda kako j’ moja roditeljica rekla da j’ va njeje vrime postojalo tako ča, ona bi bila ženski Luka Modrić.

I na kraju ćemo sopeta o glazbe. Čitan kako va Klane već ni Jerry Ricks Blues Festivala, a v Rike Zvečke. Razlog za ta nestanak ispada da je nezainteresiranost publiki. Za Zvečku ne znan, ma ono ča znan je da je na bluzu na klanjskoj gradine bilo vavek puno ljudi. No, ka san ja da sumnjan va rečeno. Još će mi reć da san popila pa da san duplo videla. Zato j’ bolje mučat, sedet va Novomu listu va svomu kantuniću i gljedat ženski nogomet. A svit neka gre kamo god ga j’ volja.