Zadnje vrime, kamo god da dojden, si tambaškaju o vojske i obaveznomu vojnomu roku. Ni baš da me ta tema neš zanima, aš va momu okruženju si su altroke prestari za bit soldati, a podmlatka ni za lek. Jedina ka bi sigurno šla da more je, zna se ki. Njeje mišljenje je da muško mora poć va soldatiju i šlus. Kad ju pitan zač i zač leh muško, odgovori da j’ za muške vojska jedna vela škola ka ženskoj baš i ni potreba, mada ako neka će da gre – neka gre. Jako podržava tu odluku i namalja kako vojni rok ni ni trebalo ukinut, a ono ča njoj se ne pijaža je ča će ti mladići dobivat soldi zato ča su va vojske.

Najme, govori moja roditeljica – to njin trebe bit čast, a ne ni tlaka, ni zarada. Rekla san njoj da pu današnjeh mladeh vredi ona »nema džabe, ni kod stare babe«, i dobila šćapon po hrbatu aš da tako govoret ne priliči njejoj hćere, ča va prevodu znači da me ona ni tako odgajala. A onput smo, kako i vavek z današnjega vrimena prošli va vrime njeje mladosti pa san naslišala kako j’ moj pokojni otac bil tri leta va vojske aš je bil va mornarice. Kako j’ za ta tri leta leh triput bil doma, ča bi ona rekla – na odsustvu, i kako ga j’ ona vjerno čekala so vrime. Kako je dugo čuvala očeva pisma i kako njoj je bilo teško – on tako dugo, a ona sama. Tako da van je to ispalo koda j’ njoj bilo teže leh je njemu, ča sopeta ni niš novoga.

Rekla san njoj da budući soldati i njihove malice neće imet takoveh problemi aš da va dva meseca kuliko će bit va vojske, i da napišu pismo, z brzinun današnje pošti, bi bili prvo oni doma leh list va sandučiću. Onput san njoj rekla da sa srića ča ne moraju pisat aš je tehnika tuliko napredovala da postoje mobiteli pa njin moru poruki slat celi Božji dan i noć. Zajedno me je ispravila ale kako bi ona rekla – a, ne, ne, moran te popravit, pa dodala – na televizije su rekli da ta deca neće moć jahat po telefonu kad ih je volja, leh kad njin je dozvoljeno. Pitala san ju – kad njin je dozvoljeno. Ni znala, ma se j’ snašla i rekla – kad njin bude vrime za to. Onput smo se sopeta vrnule da njeju mladost pa mi j’ povedala kako je celo mesto slavilo kad bi neki šal va vojsku i kako su mladići z busima hodili, i kako se j’ soplo i kantalo. To da j’ bilo već veselja leh kad je bil pir. A onda san ja nju pitala da ako j’ i va to vrime bilo oneh ki su mogli civilno odelat tu vojsku, nač se j’ skoro prehitila. Govori ona – da civilno! Si ti normalna, pa prvo j’ bila sramot ako bi ti na regrutacije rekli da nisi za vojsku, aš ako nisi za vojsku, nisi ni za ženidbu. Ni da ja se to ča ona poveda nisan već sto puti čula, ma ne moren si pomoć – volin ju škercat pa san ju pitala da z ken slučajen otac ni bil pripodoban za poć va soldati, bi se ona sedno oženila za njega ale ne. Ponemela je na to moje pitanje. Sega mi j’ zdelila i finila štoriju od vojske besedami – ča će mane vojska određivat za koga ću se oženit! Bonđorno!

Tuliko od našega pogovora, a ja smiron mislin kako će se ta Z generacija, mislin da se ova tako zove, ma nemojte me zet zdravo za gotovo aš san komać zapamtila da su si oni rojeni okolo moga godišta »bumeri«, snać va celoj toj štorije aš mi još nekako, ma ova današnja deca, me par – nikako. Morda me i iznenade, a iskreno za reć – neće njin ta soldatija naškodit, a još će njin bit i plaćeno. Namesto da gredu delat preko leta, lipo će poć va vojsku i tamo soldi zaslužit. Morda bi oni ki o tomu promišljaju mogli uvest i neš slično nekadašnjoj »rezerve«, pa lipo si penzioneri ki moru, pozvat na obnovu obuki tako da i oni moru ki solad zaslužit, ako niš drugo da imaju besplatno za jist i pit dva meseca, a i da se onemi ki nimaju kumpaniju, malo oplemeni život.

I za kraj leh da vas domislin da danaska motori pali karavana Festivala Melodije Istre i Kvarnera. najprvo će se predstavit Bakranon, na prelipomu Žalu ribara, onput će doć v Riku, pa malo va Marčanu, pa va Opatiju i za kraj pu Malinskari. Karat da još neš ima, ma najbolje se j’ snać na vrime. Ki j’ bil jedanput na MIK-u zna da j’ na tomu festivalu zabava zagarantirana, pa ni se ča čekat. Vidimo se, a onput se do sedmoga meseca ne čitamo. Ne gren va vojsku, leh na ferije. Budite mi zdravi i kuntenti.