Rekla san van zadnji put da moj prijatel i kolega Dražen Herljević vrime gubi va Novomu listu aš Baba Vanga i si njeji sljedbenici su jedno velo niš naspram njega. Dočin je čul da će kardinalon, prvo leh ih posprave va Sikstinsku kapelu zet mobiteli, rekal je – a, dobro je, brzo ćemo znat ki će bit novi papa. Va čudu smo ga pogljedali aš od kud mu sad to. A on je nastavil – va današnje vrime, čovik bez mobitela je zgubljen čovik. More bit bez jist i pit, ma bez mobitela, e, to ne more. Videt ćete da san va pravu i da ćemo najduže za dva dana znat ki će bit novi poglavar katoličke crikve. Dobro smo mu se nasmeli, a kad su papu zibrali jušto onako kako j’ on prognoziral, on se j’ sen nan slatko nasmel.

– To van je vrlo jednostavno. Da meni niki zame mobitel leh na jedan dan, ja bin ponimel. A kako su i kardinali leh ljudi, tako bi i oni, pa sad vi vidite je bilo teško zaključit da će beli dim poć brzo vanka, bil je njegov zaključak.

A sada ča se tiče dima i dimnjaka, moran van povedat ča j’ moju roditeljicu va celomu ovomu zibiranju pape najveć pojidalo. Ni ki će bit, ni skuda, ni kakov, ni je liberalniji ale konzervativniji, ni je beli ale črni – nju je pojidalo ki nalaže ta oganj va Sikstinskoj kapele i ki j’ dopustil da se va kapele nalaže oganj. Od srca san se nasmela na njeji komentari. Na kraju san njoj pokazala onu smešicu ka gre po društveneh mrežah va koj kardinali uhajaju va Sikstinsku kapelu, a zmed njih gre i Indijanac. Gljeda ona va to i pokle par sekundi me onako sočno pošalje vrit. Ne moren objasnit kuliko sočno. Doklen san tumačila o čoviku zaduženomu za dim i o patronami i o semu skupa, ona j’ leh mučala i pokle nekog vrimena pitala – a, ča bi bilo da se ta čovik od dima zabuni pa klade krivu patronu i onput zijde beli dim, a oni se još nisu dogovorili. Rekla san joj – e, pa onda bi se brzo dogovorili i niki od nas zvana ne bi ni znal da j’ došlo do pogreški. Opet me j’ vrit poslala i rekla da bogohulin i da me ni ona vadila da buden takova.

Osim dima i čovika zaduženoga za njega, imela je još dva vela bisera. Gljeda ona va ta dimnjak i govori – no, oči celoga svita su uprte va ov jadni dimnjačić, ma ča nisu mogli lipjega nabandat. Ov zgljeda huje leh nekadanji dimnjaki na Lunge. (Lunga van je zgor Meje, mesto kade su naši Cigani nekada imeli nastambu.) Onput muči, muči i gljeda koda će z televizije zić dim i govori – a, i ov krov su mogli malo popravit aš opuki su imberlane i se j’ ruvinano. Tu već nisan mogla zdurat i prasnula san va smeh na vas glas. Posljedica j’ bila ta ča san dobila z papučun po hrbatu i izgon z kuhinje aš se »z takovemi stvarimi normalan čovik ne zafrkava«, i ona j’ rodila »niš koristi, telicu ka ju celi život sramoti…« Jutros ju pitan da ča njoj se vidi novi papa, a ona onako z visoka – ako političari imaju sto dan za pokazat se, onput ih ima i papa. Znat ću ti reć kad to pasa. Avah je mane, mislin si, kad bi se ona tri meseci suzdržala od komentari, onput bin ja potpisala da j’ zemlja ravna ploča.

Kako j’ bila jako zauzeta z konklavun, onput je malo manje bacilala za trenutnu političku situaciju va selu, gradu i države, kod i za predizbornu kampanju. Malo manje, rekla san, ča znači da j’ i dalje naslihala i gljedala se vijesti, ma ni baš jako puno komentirala. Jedino je pozorno pratila sučeljavanje kandidati i kandidatkinj za mesto gradonačelnika Rike. Rekla je da j’ se to skupa niš baš jako, da ako ćemo pravo ona ne bi znala koga od ponujeneh bi zibrala, a kad san ja rekla – tebe niki ne valja osin tebe, opet je poletela papuča. Ni pogodila aš san se va ova silna leta dobro strenirala pa znan kad se rabi sprignut, a kad zmaknut. Uglavnon, moja mat ni feministica i ne misli da su žene ugnjetavane, ona misli da ni bitan spol leh karakter aš bil ti muško ale žensko, ako se ne umeš borit za se, ni ti pomoći. Pa, va skladu s ten njoj ni važan spol leh dojam, a njeji dojam je da koga god od ponuđeneh Rika dobije za čelnoga čovika, neće profitirat. Zaspraven, ona bi najraje da se vrne Linić, a ako ne on, onput baren Obersnel. Rekla bi ona i Štefan da j’ to moguće.

– Znaš ča, ja bin njih seh skupa va konklavu pa ki zijde, ta neka bude, njeji je zaključak.

Majko Božja od sedan žalosti, moj je komentar.