Najprvo da razočaran onu gospu od zadnji put ka j’ zvala otejuć znat kako zgljedaju oni čigove teksti čita i koj san obećala da ću poslikat kolegi i klast na fejs. Nažalost, obećanje ne moren ispunit aš kad san rekla kolegami da ću jih litratat i klast na fejs, dobro da san živu glavu zvukla. Počeli su mi zijat sega i sačesa, a najveć su mi spominjali on sakramenski »džidipiar«, me par da j’ to neš kako zakon o zaštiti osebneh podaci ale va prevodu nećeš ti niš ča ti ja ne dozvolin. Drugačje reć – vadi nos z moje intimi. Da san slikala poskriveć, verujte da bi me pol od njih naganjalo po sudu, a druga polovica bi imela duševne boli ma bi bila prelena da me tuži. Kako san već imela okapancije i tužbu za duševne boli i to jušto radi teksta napisanoga va ovomu kantuniću, i to mi se ni najmanje ni pijažalo, lipo san njin rekla – hote vi si skupa mater ženit (zaspraven san njin rekla onu prosteju varijantu), obrnula se na pete i šla nabadat po tastature va svoj kantunić. Sako malo san zabrundala zad kompjutera i namaljala, a bolje da ne znate ča. Bila san ofenđena, ma ni me dugo držalo.

Dočin su počeli tambaškat o škole nekada i danas, bin bila pukla da se nisan ukopčala va diskusiju. Najme, počeli su o knjigami, tekami, boršami, tenesicami, kabanicami i ča ti ja znan o čemu još ča saki školan mora imet. Rekla san kako san ja hodila va školu va puno humanije vrime aš da smo si nosili kuti i niki ni znal je spod kuti nekakova skupa brendirana roba ale normalna. Va razred smo hodili va papučicah pa smo sopeta bili si isti. Na fizičkomu smo imeli trikoi ale dresi, ovisi o tomu si bil muško ale žensko, a knjigi smo va škole dobivali. Niki se nikomu ne bi špotal, bar ne po tomu pitanju. Zajedno su me proglasili nostalgičarkun, a ja san jih vrit poslala. Još da san njin rekla kako san ja kutu i va gimnazije morala nosit, mislin da bi me klali va muzej zgubljenih iluzija. A zbilja san. Istina leh prve dve leta i leh na satu biologije ki nan je držala prof. Jonke. Ona j’ bila profesorica staroga kova, već je onda i ona bila stara i ni dala da njoj se niki pača va njeje reguli. Kad biš odgovaral, moral biš poć spred ploči, a kad bi finilo ispitivanje ona bi zela naliv-pero i rekla, recimo »pišem jedan, pamtim četiri«. To j’ bilo dobil si jedan, a kad naučiš morda dobiješ i četiri pa se to računa koda si dobil pet. Mane j’ to njeje ocjenjivanje i dandanaska ludo zabavno i da san z ken slučajen finila kod profesor va nekoj škole, sto posto bin govorila ča i ona. Intanto, va tomu pogovoru o škole nekada i danaska mnogi su misleli ča i ja, ma valjda od straha da ne bi ispali postarinski su blebetali leh da blebeću. Ma, ki zdravoga mozga more reć da j’ ditetu lipje kad ga mater ale otac popelje va školu z autom leh da gre z kumpanijun. Još morda otpeljat aš va školu ne smeš zakasnit, ma dopeljat, e, pa to j’ od Boga greh. To znači da moraš poć drito doma, a ne obletet si dolci, poprtit se na saku črešnju i načinit milijun monadi po putu do domi. Ja to jednostavno ne moren razumet i mislin da su današnja dečina zakinuta za društveni život, ma kuliko ona bila drugačja od moje generacije i ma kuliko njin mobiteli, tableti i druge modernarije bili najbolji prijateli. Zato i su, kako bi se to po modernu reklo – pretili. Nas su tofali z pekmezon i kruhon, šimunelun, hrenovkami i sengvićimi, črni kruh nismo ni znali da postoji, kamo onaj z sjemenkami, ma sedno smo si bili kod šćikadenti. A se zato ča smo va školu šli hodeć, a ne vozeć. Ni da ja ne razumen današnji roditelji i decu – razumen aš današnja dečina gredu na plivanje, tenis, gimnastiku, mažoretkinje, klavir, flautu, balet, miće manekeni, na…, a dan ima leh 24 ure. Ja, roditelji moje generacije su očito bili manje ambiciozni pa na nan nisu baš va tolikoj mere lečili vlastite kompleksi. Ne generaliziran niš, ma kad čujen na ča se gredu ta brižna deca, slabo mi dojde.

Uza sa ta pohajanja, me par da oni najveći del vrimena provedu na dodatnemi aktivnostimi i va autu. I zač se onda čudimo ča danaska mladi do 35. leta žive z roditeljimi. Pa to su deca moje generacije, a kako naši roditelji nisu nas baš puno gljedali, onput mi delamo se da se nan to isto ne dogodi i ne pušćamo tići da odlete z njazla.