Smiron malo mislin kako naši glavni zmišljaju zakoni leh da bi ovi sled manje glavni, ča će reć glavni na nižoj razine, misleli i domišljali se kako nać škulju va temi zakonimi ke su donesli glavni. Koda ti glavni paze da mozgi oveh spod njih ne zakarunjaju. Primer za to je ov novi zakon o delanju po nedelje i blagdanon.

Evo, kuliko j’ rabilo vrimena da zakon postane kod švicarski sir – vas na škulji? Sad najedanput postoji i sajmeni dan ale dan od samnja i saki drugi grad ale mesto se poziva na pravo da ga ima, pa ispada da smo mi samanj država. Ne znan je to loše ale dobro aš na sakomu samnju se ljudi dobro zabave i bude njin lipo ča znači da j’ i nan va našoj samanj države i zabavno i lipo, a bože moj, na sakomu samnju i kupiš ono ča ne biš, i platiš već, i prevare te, ma k vraniću se – kad dojdeš doma nekako si zadovoljan. Zanimljivo je i to ča išću škulji va zakonu i oni čigova j’ stranka digla ruku vajer za usvajanje toga zakona i oni čigova j’ bila protiv, morda čak više ovi prvi, ča znači da j’, kako i vavek, život pobjedil pulitiku.

Za bit iskren rabi reć da j’ ta zakon smešan aš ako va peknjicah moreš na neradan dan kupit slatko, a ne moreš kruh, a na pumpah ga moreš kupit, onput neka se skupa gre mater ženit. Tr Italija je altroke crikve vjerna zemlja pa va turističkemi regijami se dela, a mi se delamo veći pape od pape. Mišljenja san da j’ trebelo pušćat sakomu delavcu na volju pa ki će delat po nedelje i po blagdanu neka dela, a ki neće neka počiva. Onoga ki dela trebe platit kako rabi, a onomu ki ne bi delal trebe pušćat na volju, prez ikakoveh sankcij. I mirna Bosna! Ovako smo va situacije ku volin nazvat – ni drek leh se j’ pas poblatil, da ne rečen ono drugo. Intanto, mi odovuda ne moramo čekat ni Belu nedeju va Kastvu, ni Belu nedilju va Križišću, do onda imamo samnji kade nan srce poželi.

A srce nan poželi i se ono ča se na place nudi, a nudi se sega i sačesa aš leto je – kada će ako ne sada bit sega va izobilju. I sopeta ista štorija. Oni ča prodavaju skucaju da su morali poskupet aš je poskupelo se – od zemlji, gnoja, ono ščen se šprica kompirova zlatica i salatna uš do transporta i mesta na place, a oni ča kupuju da su ceni bezobrazno visoke i da nimaju solad za hitat. Od kada znan za se tomu j’ tako i od kada znan za se vavek od nekoga čujen – pretegni se kuliko ti j’ lancun dug. Nisan od pohajanja po place ma okolo mane je fanj takoveh pa više-manje znan kuliko ča košta i ja – čini mi se da j’ skupo poć na placu, ma sopeta bin raje dve praskvi z place leh kilo z nekoga od trgovačkeh centri ma kuliko to kilo bilo ceneje od one dve praskvi. Ki’vo dan mi je, kad san to rekla na delu, jedan kolega odgovoril da j’ mislel da san šegaveja aš kako ja to ne znan da j’ pol toga na place kupljeno va teh veleh butigah i prodaje se ovakovemi monami kod ča san ja. Leh san mu odgovorila – oni ki gredu na placu znaju kod koga ča kupuju, a ti nikada nećeš imet svoju placaricu aš ne veruješ ni samomu sebe, a kamo komu drugomu. I tu smo finili aš, slažen se da čovik mora bit oprezan, ma k vraniću se ako nikomu ne veruješ.

To j’ isto kod z đelaton. Si su se digli na zadnje nogi i si broje i prebrajaju kuliko euri moraš zbrojit za jednu kuglicu. Negdere jedan, negdere sedan, a ča ja znan – more bit negdere i već od sedan, ma to j’ sad va drugen planu aš niki ne misli je to ča j’ kupil zdravstveno ispravno. Žalosno je da nan je sen skupa najprvo na pamete takujin, a tek onput zdravlje. Ma i ta stav je, nažalost, leh produkt vrimena i situacije va koj živejemo.

Ča se pak tiče moje materi, njoj je jušto se sedno. Ne pojida nju ni ča j’ poskupelo, ni ča kuliko košta aš mi j’ rekla da j’ to moja briga i da neka ju ne mutin z temi eurimi. Nju jedino zanima kakovo će vrime bit koda kamo gre pa njoj je to najvažneje. Kad san ju pitala da ča njoj se vidi to sakidanje gljedanje prognoz mi je odgovorila – gljedan da vidin ako san ja bolji prognostičar od oneh na televizije. Bledo san ju pogljedala, a ona mi j’ pojasnila kako prvo leh oni reču svoje ona zna – ako ju bole kosti će daž, ako njoj kosti škriplju će puhat, ako ju boli glavina će se vrime promenit, a ako ju boli se skupa da će vela nevera i brza promena vrimena. Počela san se smet i pitala ju da kad će oglasit črljeno upozorenje za kastafsku regiju, a ona ga j’ oglasila šćapon po mojen hrbatu.

E, predsjednik i premijer su si dali ruku, ma nas dve, mepar, nećemo nikada.