Ne znan ako j’ i van, a mane je, ča bi se reklo »spod radara« pasala informacija da se peknjice smeju delat leh do deset ur večer. Ta befel je bil del onoga sakramenskoga o delanju butig po nedelje. E, pa kako bi se reklo – ja, od šume nisan videla drvo doklen nisan noson bubnula na zaprta vrata od peknjice.

Najprvo san mislela da j’ to jedna jedina ka j’ promenila radno vrime aš su ferije, morda i zato ča nima delavci i slično, a ni na kraj pameti mi ni bilo da j’ to zakonon tako propisano. To san doznala kad san i va drugoj peknjice bušnula vrata, a va tretoj mi je gospa objasnila o čemu se dela. Sad vi govorite da ča blebećen bez vezi kad kruh moren kupit kade god i kad god, zač mora bit va peknjice. E, pa ni po srede ni kruh, ni kroasan, ni slatko leh – burek. Moja je generacija navadna da pokle sakoga izlaska gre ča pojist, ma ne burgeri, hotdogi, kebabi ale ča ja znan ča. Burek nan daj i mi srićni. Va fastfudi gremo kad je sila, a ne kad je odabir. Intanto, z oven radnen vrimenon peknjic će nan ti spomenuti, kako bi se po hrvacki reklo – brzogrizi, bit jedini izbor aš oni delaju i do dve zapolnoćun. Neka daju, ja niman niš protiv. Varamente, ča se mane tiče moru i celu noć aš saka roba najde svoga kupca, ma pušćajte nan ki smo pomalo retro da si moremo kupit jedan običan burek.

Ovo z burekon ni fer aš burek je va življenju velog broja generacij z oveh prostori kultna namirnica. Sad na bandu ča retko ki zna da j’ burek jedino onaj z meson, a se ostalo su pite, ma koga briga – bitno j’ da su prsti masni, a trbuh pun. Si smo ga jili, va mladosti i saku drugu noć, ma niki od nas ni bil debel ale kako to sad reču – pretil, a bome ni Hrvati nisu bili med najdebljemi va Evrope. Ma, sako vrime nosi svoje brime pa j’ tako malo po malo i burek med mladimi šal mater ženit, a mi stareji, ki ga još štimamo moremo ga jist do deset večer, a pokla zubi na policu. A, koda j’ čera bilo domislin se kuliko si okol uri zapolnoćun moral Pu braći čekat va redu za tu poslasticu. Nekad bilo, sad se spominjalo.

Kad smo već pu spominjanja, se domislite vi kuliko j’ toga jida, ko j’ nekada bilo bar jedanput na šetemanu na primorskomu jelovniku nestalo ale će saki čas nestat? Recimo, ki’vo dan san na jelovniku jedne oštarije videla da imaju juneća jetraca na gulaš z palentun. Pomislela san – Bože, kuliko to već nisan jila, a kod dite san se va tomu gušila. Pa san pitala i kolegi kada su to zadnji put jili i si su odgovorili da se ne spamete. Pa smo nastavili ćakulat od nekadanjeg jida i dobro se nasmeli, a zaspraven je ta pogovor bil za plakat aš od sega ča nan je nekada bilo normalno za pojist danas niki ni ne kuha, ni ne ji. Domislin se kako j’ pokojna teta Vilka vavek zamanun tekla z pohanen telećen mozgon aš da mi j’ to zdravo i da ću bit šegaveja.

Kako sad stvari stoje, bit će da me ni dosti puti ulovila aš nit san neš jako zdrava, a bome ni šegava. Ono ča san jako volela, a volin i dandanaska je kiseli kapuz i fažol ale kompir i kisela repa. Jasno da j’ nutre moral bit kuhan knjak, kod i va pašte i fažolu. Volela san i jetraca na se načine, a najveć želučići od kokoše natanko narezani i z jajimi pofrigani. Da danaska daš ditetu ti mozgi i te iznutrice, nedaj Bog kakove tripice, zajedno bi popalo oni SOS-i telefoni i ode ti vrešt i to po dve optužnice. Najprvo bi te tužila »društva za zaštitu dece«, a onput i »društva za zaštitu životinja«. Dobro, malo karikiran, ma tako je. Leh da van još rečen kako šimunelu ni dandanaska nemoren smislet i neću već od jida.

Gremo va Sabor. Videla san danaska da saborski zastupnici osin ča imaju velu plaću aš donose vele odluki, imaju i veli izvanredni izdatki aš za donest velu odluku moraš putovat, ča cestun, ča moren, ča zrakon, i to ne leh va Sabor već i po celomu svitu. A ako putuješ moraš negdere i spat, jist, pit, nekoga počastit, moraš platit cestarinu, vozarinu, splavarinu i ča ja znan ča se ne i zbilja mi ni ćaro zač se sad pučanstvo buni i staje na zadnje nogi radi toga. Ako misle da j’ lahko donosit vele odluki i bit stalno na putu onput neka provaju. Za postat saborski zastupnik nikada ni kasno, a i penzija se brzo zasluži, pa ki voli nek’ izvoli.

I leh da znate, ni ov put niasan mogla va Hroljevo aš san delala. Da ti pas mater kurbu prasicu i pol i delu. Kako bi bilo van da van Đulijano kanta va dvorišću, a vi kljucate po tastature va Zvonimirovoj?