Ako niste znali, moje mesto slavi 150 let od kada je dobilo školu. Morate priznat da j’ to vela stvar, a moji su Krasičari tu obljetnicu prelipo obilježili. Program proslavi je bil jako sadržajan, ma mane j’ najlipje bilo na foto vremeplovu kada se j’ va jednu učionicu narivalo, ni sama ne znan kuliko generacij i povedalo štoriji od škole i školani svoga vrimena. Teta Boća je sa svojeh 87 let bila najstareja školanka, a kako se zovu oni mićeri ki još vavek va tu istu školu gredu, to ne znan. Kroz ta povedanja pretresli smo i povjest mesta tamo negdere od pred Drugi svjetski rat do današnjeh dani. Domisleli se na mnogi učeniki i učitelji, na to prelipo vrime va komu se školani nisu morali za niš jako pojidat osin da pasaju razred. Do suz san se nasmela na štoriju od barba Frana ki j’ odlučil sam da gre va školu od šest let aš ča će on doma delat kad mu kumpanija gre va školu, a pokle se je i sam zapisal na daljnje školovanje va Bakar aš pu nas na Krasice je pučka škola, ča će reć ona do četrtoga razreda.

Ma čuda teh smešic je bilo aš saka generacija ima svoju povijest, ma ono oko česa su se si složili je da se to vrime pučke školi nikada ne pozabi. Recimo, ja se spametin imena sakoga ki j’ s manun va školu na Krasice hodil, znan se tri učiteljice ke su mi predavale, a z daljnjega školovanja leh tu i tamo nekoga. Stareje generacije su povedalo da su jih učitelji znali i oćepat, šibun natuć i za vlasi povuć, ne daj Bog da danaska ki to načini, zajedno bi dobil otkaz, a more bit bi ga i roditelji premlatili, za razliku od prvo kad si najprvo dobil va škole, a onput još i doma ako si se požalel.

Lipo j’ na tomu druženju govoril i ravnatelj bakarske školi pod ku spada ova krasičarska. Spomenul je tužnu činjenicu da j’ se manje školani i da se se već pučkeh školi zapira, ma j’ lipo rekal i da doklen je on ravnatelj, ma kuliko pal broj učeniki, da će načinit se da takove školi ostanu oprte. Držin ga za besedu i želin mu da bude ravnatelj do penziji. Kako j’ mlad čovik, to smo si kupili jako puno vrimena, a morda će i dece bit više, aš ljubavi na Krasice ne fali – kako za školu, tako i inače.

Prelipa j’ bila i izložba slik postavna po školskomu hodniku. Te su sliki isto povedale povijest, kako mesta tako i školstva na Krasice. Na jednoj skupnoj se nisan mogla nać aš nisan oćali imela pa san zvala upomoć, a kada san se videla prasnula san va takov smeh da j’, baš kod nekada kad bin se smela – cela škola zazvonila. Škola danaska ima zvono, a va moje vrime, ovisno va ken razredu san bila, za se ča j’ rabilo, zvono j’ bil glas od učiteljice Maje, Željke ale Božene. Me par da j’ tomu tako i danaska aš se učiteljice va krasičarskoj pučkoj škole, a seh ih poznan imaju normalan odnos s decun, kad rečen normalan to mislin da se deca va toj škole i danaska ćute koda su zaspraven doma. Poznan seh pet učiteljic, neku već, neku malo manje i potpišujen da i Bosiljka, i Ivana, i Gordana, i Sandra i Maja tu dečinu obožavaju. Da tomu ni tako ne bi njin i kad projdu va viši razredi deca dohajala va školu leh malo pozdravit, a one ne bi i za dvajset let od kada j’ neki finil školu za toga istoga govorile – on je bil moje dite.

To van je tako na Krasice, od mojeh dan do danas, za ona prva vrimena ne moren niš reć, ma naslišuć kako ti stareji školani povedaju o svojemi učitelji, mislin da j’ i prvo bilo tako. I ne mislin da j’ to posebnost samo moje pučke školi, mislin da j’ tako va sakoj maloj sredine i mićoj škole aš ni isto va razredu imet 25 đaki, i 10 ale još manje.

I za kraj, domisleli smo se Zvezda, Karmen, Rajko, Gordana i ja jednoga skupnoga izleta na Platak. Skupno znači da j’ na Platak šla cela Osnovna škola Bakar. Na tomu smo se izletu tako potukli mi Krasičari i oni z Bakra, a da do dan danaska nikomu od oneh spomenuteh ni bilo ćaro zač. To j’ bila bitka altroke se one ratne ofenzivi, a razlog nepoznat ale kako smo to šegavo dokončali – ča opće išćemo razlog, potukli smo se z Caponi, naprašili smo ih i to je to. Nadan se da moja mat neće ovo doznat aš mogla bin fasovat, onda san doma došla z tako velen kikoron da san bila kod jednorog z natečenin lakton, a ja san rekla da san se popiknula i pala. Da j’ znala da san se tukla, rit bi me bolela još i sada. Avah je mane, ča se ona ni znala…

Ono ča ja znan je da besedi od učiteljice Bosiljke ke glase – ovo je mala škola velikog srca, najbolje opišuju moju školu na Krasice.