Va črljenen smo. Sad bin najraje rekla – šok i vjeverica, ma ča ću samoj sebe lagat kad san, jušto kod i si vi znala da će nan z turistimi proć i on naranžasti kolor. Ča se to ljuden dogodi da njin dočin turisti parte pade imunitet? More bit se va sezone jako nadelaju, a more bit se šopaju z vitaminimi i sličnemi stvarimi da zduraju leto i navalu gosti, pa kad se naglo opuste ode se va trešće.

Ne znan ča je po srede, ma ovo ča nan stručnjaki govore da će bit teh vali još, e, to mi se nikako ne pijaža. I zato, ljudići moji dragi, hote se cepit, ako ne z uvjerenja, onput leh zato da nan ne propade to silno cepivo ko stoji na lageru, dura do desetoga meseca, a košta silni soldi. Vidin da su već neka poduzeća počela radnikon plaćat ako se gredu cepit, pa me j’ strah da sad to ne postane veli biznis, a nikakova korist.

Kako i mnoge stvari pu nas. Razumen ja i seh oneh ki imaju dilemu okolo trete dozi aš ni to leh tako poć. Ča ako va telu imaš dosti teh antitel ale »protiv tela« kako reče jedna moja kolegica, ča će se dogodit ako ih preveć va se leješ? Tako da ću ja lipo poć najprvo pobrojit kuliko česa je pa ako fali, neka buše kuliko god puta rabi. Ale kako reče stara narodna – kad telo pita, daj mu!

Sad cepilo na stran i homo malo sopeta na ta diva i egzotična blaga. Srce Isusovo, ja san se skoro od straha zbatila leh ča san videla sliku i na slike pitona ki lipo gmiže po Kozale. Ne želin ni mislet ča bi bilo da san ga va živo utaknula. Me par da bi me se čulo vriskat do kraj svita i nazada, a more bit i da bin se leh zrušila pa neka kačka dela ča njoj je delat. Gljedan ja va ta mobitel i pokle prvoga šoka samu sebe tješin – ma ni to pravo, to j’ sigurno nekakova fotomontaža. I taman kada san si dopovedala da j’ to nemoguće, vidin da j’ vijest na seh portaleh i da j’ ta sakramenski piton za zbilja živ i plazi po rečkomu kvartu.

Božiću moj dragi, neka i nisu si strašljivi kod ča san ja, ma zamislite da j’ na tu kaškinu naletelo kakovo dite! Pa to j’ trauma za celi život. Intanto, kada san malo došla na se i polovila si konci i končići, dokončala san da su vatrogasci sopeta spasili stvar. Kako su ju ulovili, kamo spravili, ne znan, kod ča ne znan ni kako j’ ta beštija zgmizala z terarija vanka, a još manje razumen ti ljudi ki drže kaški po kuće. Vjerojatno ni oni ne razumeju to ča ja držin mašku, i zbilja nisan mislela nikoga uvredit leh reć da se za blago, zvalo se ono uobičajeni ale bilo egzotični kućni ljubimac, rabi pojidat. I za kraj leh da van rečen da su vlasnici došli po svoga, fanj nestašnoga kućnoga ljubimca, i zeli ga nazada doma, kod da se i ispravin aš, najme, ne dela se o pitonu leh o kukuruznoj zmije. Ma, more ona bit i od hrmenti, i od šenice, kaška j’ kaška i odkada j’ poskok ujil moga parona, ja ih doslovno ni narisane ne volin videt.

Neka žive sretno i dugo, ča bi bajka rekla – do kraja života, samo ne va mojoj blizine.
Sad divo, a kako stvari stoje još malo pa domaće blago. Naravno da se dela o medvedi, srnami, jeleni, veprimi, lesicami i slično. S ken god da povedaš čuješ da j’ videl divoga prasca. O onomu ča j’ šećuć po Mihanovićevoj mirno protestiral aš je »Baćo« bil zaprt pa ni mogal na kafe, celi grad poveda. Kostrenjanon su njihovi već sakodnevica ale, bolje j’ reć sakonoćnica. Moja kolegica z Kostreni govori da ako jih ku noć ne čuje, ona da se duboko zabrine da njin se, ne daj Bog, ni ča dogodilo.

Druga, ona z Griž mi stalno kaže sliki kako srnica dohaja tete Zlatice na jutarnju ćakulu. Da samo ča još ne ume sama vrata opret. A kada smo pu te z Miroši, ona pak samo ča još ni utaknula zmaja z tri glavi ki riga vatru. Najprvo j’ nemela radi miši, onput su na red došle kaški, o diven prascon da ni ne govorin, a me par da j’ rekla kako njin je i medved va selu. Ako ovako nastavi, ja ću njoj poć isposlovat da kraj tabele od mesta piše i ZOO. Me par da su i pu nje va strahu vele oči i da j’ njeja mat kraljica svemira aš ta ista gospa niš ne prepušća nagajanju, ona j’ lipo preko Topšopa naručila lampadinu pa kad čuje da neš rošće, zajedno skoči z postelje i z lampadinun na balkon da zna o čemu se dela, a ne da nagaja. Saka njoj čast, ma o ovomu neću matere niš povedat aš bin morala i ja po lampadinu. Ona bi ju koristila va iste svrhi – nikako me po noće ne more potirat spat, jutro me ne more zbudit, a ionako me zove blago.