Danas nan se terase opiraju. Jedan moj poznati ne more doć k sebe od veselja i srići, a mane jušto sedno. Zaspraven, nekako mi se vidi da ja već ne znan poć va oštariju, a se manje znan opće hodit med ljudi. Ne dami se z domi van. More bit je i bolje aš kada mi neki va butige puhne za vrat reskira velu nevolju – oči bin mu mogla skopat ale va najblažoj varijante spomenut celu familju od stoljeća sedmoga na simo. A ljudi su blaga. Briga njih za one žute crti, za distancu oni bi se sad i zajedno. Kuliko puti se pitan ča j’ takovomu va glavine kada se riva, a dobro zna da preko onoga spreda sebe ne more preskočit.

A da van ne govorin kako mi se želudac obrne kad vidin da neki z golemi rukami zname kruh z police, malo ga popipa i ako mu ne paše vrne nazada. Jedanput san jednoga takovoga skoro z košaricun po glave bubnula. Moran pripazit na agresiju aš će na vrateh od butig pisat da mi j’ ulaz zabranjen. Koda bin ja šla rivat se tamo da ne moran. Jist moran, ma va oštariju bome ne moran. Da mi j’ nekad neki rekal da ću ja napisat ovo ča san bin mu rekla daj vela trubila. Kod ča su trubile i si oni ki mi govore – ča ti paničariš, tr ti si dva puta cepljena. San, ma ni moja mat ka ima 84 leta i ne rabin njoj ja cepljena donest virus doma. I da van buden najiskreneja, ja ovi stožeri niš ne razumen. More bit san bedasta, ča ni dugo od istini, ma mane nikako nisu ćare te njihove odluki.

Recimo, ki’vo dan govorimo o tomu kako bolnica ima va pripravnoste poljski kreveti, zlu ne rabilo, a dva dana kašnje, stožer donosi befel z ken ukida stroge meri i na veselje svekolikoga puka opira terasi. Ala, sad mi vi recite je van to logično? Mane bome ni, ma ka san ja da promišljan i domišljan, koda ja znan ča se zada brda štrče. Moj kolega i prijatel Gromičan kada smo tambaškali o ovoj nelogičnoste rekal je – a, ča Mili to ti j’ kod z faksa na posao. Ma, ča povedaš, govorin mu, a on odgovara – je, leh ča j’ ovo z terasi na poljski krevet. Črni humor, ki se, nadan se neće obistinit.

Imel je moj Gromičan još jedan biser ta dan. Povedali smo o onoj ceste ka prohaja kraj Hiltona i ka se, po semu sudeć, neće zglancat, a ki god je leh jedanput pasal šnjun zna o čemu povedamo. Povedamo o škuljah, gobami i slično. Ne moren ni zamislet reakcije oneh ki koriste usluge Hiltona, a znamo da ti isti imeju fanj dubok žep, pa z takovun cestun dojdu do njega. Me par da će se na pol obrnut. Ma zakoni, ovlasti, financije i slično su jedno, a život neš sasma drugo. I kada smo se to dokončali javlja se Gromičan i govori kako bi na reklamah od rečkoga Hiltona trebelo pisat – preko rupe do Hiltona. Ako Rupu napišemo velen slovon, niš nismo lagali, a ako ostane z malen znači da jedino rečki Hilton od celog lanca hoteli razvija avanturistički turizam. Pa smo sopeta drugačiji – luka različitosti.

A luka različosti za ki dan prestaje bit europska prijestolnica kulture. Je mi žal? Pa jedan sled i je aš sad gubin jedan veli bazen za karat se z onemi ki ne misle isto ča i ja. Od Boga srića ča su ti sakramenski izbori pa tu kara i da će ne more falet. I med onemi ki se utrkuju za funkciju, i med njihovemi simpatizeri, i med političnemi, i med apolitičnemi. Si mi najdemo neš za razmenit mišljenje i na tiho i na jako. V Rike prava gnjeta okol gradonačelničke fotelji. Ne znan ča j’ va toj sakramenskoj kantride tuliko primamljivo aš mane da ju nude pobigla bin glavun bez obzira. Ma vlast je slast, rekla bi moja nona. Intanto v Rike ne glasan pa na svetomu miru moren z bandi gljedat i naslišat ča si ti kandidati povedaju.

A mnogi povedaju leh da povedaju. Njihoven planimi i obećanjimi ne bi poverovala ni dečina z vrtića, ma briga ih – ako pasaju va sekunde će i oni, i si pozabit ča su va kampanje mašili i otpevali. Ča se pak dotiče teh potpisi ke skupljaju, to j’ isto jedna vela nemotarija aš se ljudi potpišuju semin. Jedan barbić mi je rekal da mu to vela zabava aš da nima baš kamo poć, pa se lipo odbavi va grad i gre od jednoga štanda do drugoga i daje potpis potpore sen. Pitan ga da zač, da to ni legalno, a on će mane:

– Mala, vranić zel i tebe i legalu, ča j’ pu nas legalno? Gren, potpišen, negdere dobijen fajercak, negdere lapiš, pa dezificijens, pa lumbrelu, pa lipu besedu i tako regalan i naćakulan gren doma.
Da bin besedu rekla.