Saki put mi se lipo vidi kada projden na ferije pa me ni va ovomu kantuniću, a vi pozivate i pitate kade san, ča j’ s manun, ne daj Bog san bolna. To znači da se pojidate za me, a sakomu j’ lipo znat da neki misli na njega. Jedino ča se znan zapitat zač vavek si mislite na grdo. Recimo zač ki put ne bi zazvali i pitali – si pobigla na kraj svita? Si dobila na lotu? Ale morda – si se odselila na Mars. Ma škerac na stran, znan ja da kad ti je neki srcu drag najprvo pomisliš na zlo, a ne na dobro. A ča san delala na ferijah? Znate i sami da niš šegavo. Zaspraven san najveć spala. Mat je rekla da me j’ sto posto Ce Ce muha ujila i to ne jedanput.

Kad san ju pitala zač se ta muha zove Ce Ce muha, vrit me j’ poslala tako da njoj nisan spominjala pustinje Saharu i Kalahari zmed keh ta mušina operira i va keh ja nikada nisan bila, aš bin bila sigurno dobila i oklepuh.

Kada smo već pu materi i dalje je va klase »antivaskeri« i stalno namalja ono svoje da se cepe leh pasi, a ne ljudi. Vranić me zel ako ne bi bila prva na cepljenju da se ne boji i injekcije i dohtori. Kad san se ja šla cepit, rekla mi je da nisan normalna i da neka dobro razmislin da ne bi bilo pokle oceranja. Kad je videla da san preživela to prvo cepljenje, rekla je da mane ni cepivo neće.

Kako god da obrnen, ne moren njoj dopovedat kuliko j’ važno poć to načinit. Me par da bi prvo stendil kamik leh ona. Intanto j’ na tomu cepljenju bilo fanj zanimljivo. Cepili su me va Domu zdravlja na Vežice i to z Modernun. Bit ću van iskrena pa reć da san neš malo čula za Fajzera i Astrazeneku, a za ovo san znala leh da postoji, ma mane j’ bilo jušto sedno aš za razliku od roditeljice ja nisan ona ka leh na se misli. I nisan šećala spred ambulante i čekala da me zazovu aš je ostalo cepivo pa da se ne hiti. Nažalost spadan va rizičnu skupinu pa san dospela na cepljenje z onemi starejemi od 65 let. I da van se pohvalin, nakon dugo vrimena bila san najmlaja va čekaone.

Pol od oneh ki su čekali cepljenje san i poznala aš su bili z Krasice i Praputnjaka pa san imele i z ken poćakulat. A neki su i mene prepoznali pa san i z te bande bila kuntenta, a priznat ću van i fanj bedasta. Kad me j’ jedna gospa pitala da ako san ja – ja, pitala san ju da kako zna, a ona mi j’ odgovorila – nima puno njih zeleni vlasi. A onput je ona mane pitala da ča mi se videlo kad san klala to zelenje na glavu, rekla san njoj – otela san bit »evergrin«. I tako san nasmela celu ekipu ka j’ sedela va prostorije i čekala petnajst minuti, za ne daj Bog reakcije. Lipo smo se napovedali i va kvarat ure pasali se, od koroni, preko vrimena do politiki. Složili smo se da trebe poć i na cepljenje, i na izbori.

Kampanja još službeno ni počela, ma kandidati i na lokalnoj i na državnoj razine kampanaju i lamantiraju. Puna usta lipoga. Na lokalnoj razine pogotovo. Čoviku dojde da pomisli kako će, recimo Rika, ki god da bude zibran za gradonačelnika, a kandidati je veli broj i vela je gnjeta za tu funkciju, dočin Obi odstupi, postat Eldorado. Jedni će se trsit da va zdravomu telu bude zdrav duh pa će delat igrališća, drugi se pojidaju za stari pa će delat novi domi za stareje osobi. Tretemi je na pamete kolodvor. Četrti se pojidaju za cimiteri i ono ča ja zoven »grobni namet«, peti za radniki i njihova prava i tako dalje, i tako bliže. Z oneh džambo plakati gljedaju te »snažni ljudi, i snažne poruki«. Od cele te šumi teško j’ videt pošteno drvo.

A na državnoj razine ne šuma leh prašuma. Zaspraven mislin da j’ još huje, aš me par da i oni va prašume civiliziraneje povedaju leh naš državni vrh. Ta pogovor pas z maslon ne bi pojil. Presjednik mlati zajikon huje leh batićen. Vrnjaju mu istun merun. Postalo je huje leh najhuja sapunjača od oneh ke moja mat prati na televizije, a da jih fanj. Štufo i za gljedat, i za naslišat. Ako ovako nastave rabilo bi na sake vijesti ale dnevniki klast ono »zabranjeno za mlaje od osavnajst let«. A neka delaju ča ih je volja, ni da mi je drago ča se tako nahićuju grdemi besedami, ma kad ne moreš neš promenit, onput ne bacilaj za to.

I ufan se da ste imeli na Uličnicu »mašu za po doma« aš rivat se pa i va svete svrhi va današnje vrime ni preporučljivo. On gore će prvo razumet leh mi dole.