I tako dojde dan kad biš već od ranoga jutra se i seh poslal tamo od kuda su došli. Kako j’ do k večeru dugo, najbolje mi je mučat, a bome i sen okolo mane aš ne garantiran za svoji postupki. Kad se razjadin huja san na zajičine od najhujega va države, a to j’ naš dragi presjednik. I ja san kod ča j’ on na crnoj liste od Ukrajine, na crneh listah od mnogeh. Ča bi moja mat rekla – imaš v rite pedeset i osan let, a pameti ni za pet. Kad ćeš se navadit mučat. Nažalost, vjerojatno nikada aš mučat je talent koga ja niman. Intanto, trenutno san va faze da listan oglasniki i čitan mići oglasi išćuć ako ki za mići soldi prodaje velo stado ovac. Niš još nisan našla osin da ljudi prodaju ovčji gnoj, a to mi ne rabi.

Ča bin ja z ten stadon? Pa, promenila bin zanimanje i konačno prestala bit ovca i postala čoban ale čobanica. Bin ja to znala? A, iskreno za reć – ne znan ako bin umela, aš ne da san jedanput pisala od ovac i čobani pa mi j’ ćaro da to ni ni malo lahko delo. Z gromiškemi čobani i njihoven ovcan bila san na čuda ravnic, kako oneh na polju tako i oneh va šume. Moran priznat da mi se letnja, ča će reć planinska ispaša puno više pijažala. Ma ne i čobanon pa san već va startu pukazala kako se baš ne razumen va to delo. Sledeće pitanje glasi – da umen must? Sad ćete se šokirat aš umen. Baren mislin da umen. Najme umen must kravu, a nekako mi se čini da j’ isto must kravu i ovcu. More bit i grešin. Provala san jedanput na Pagu i ni mi to loše hodilo. Kako saku noć brojin ovci aš nikako zaspat mislin da mi ni jedna ne bi falela aš bin jih stalno brojila, a konačno bin mogla i zijat na sa usta, a da mi niki ne zameri. Ča j’ još važneje one mi ne bi mogle vrnut.

Mat mi govori da blago ni za me aš da z blagon trebe znat, a da ja ne umen ni z ljuden, a kamo z blagon. Nastavlja da j’ naslišala na radio kako išću delavci va turizmu i to seh vrst, ma nažalost da ni to ni za me. Najme, kuhat ne umen ča znači da ne moren bit kuharica, pomoćna isto aš je padela teža leh san ja. Zač ne sobarica, pitan? Ona odgovara kako užan bit naivna kod sobarica ma za bit ona prava rabi delat, a ja da bin se kad bi mi dojadilo polegla na prvu postelj namesto da ju načinin. Govorin da bin mogla recimo delat na recepcije, a ona će – biš ako bi si ki dojdu govoreli čakavski i ako niki ne bi imel nikakovu primjedbu na niš. Ne bin mogla bit ni liftboj aš san fanj klaustrofobična, a za kuferi nosit i sama znan da nisan. Za delat va kakovomu hotelskomu kazinu isto nisan aš iman preveć let i predug zajik. Turistički vodič mi je rekla da ne moren bit iz više razlogi – zmišljan povijest, ne volin puno hodit i zijan na ljudi. Dakle, zaključak je niš od mane va turizmu.

Govorin njoj da mi ni druge leh poć na kakovu lanternu ako jih nisu se već automatizirali. Moran van reć da se j’ nasmela do suz. Pod jedan da ki bi mane prepustil tako velu odgovornost kod ča j’ ta, pod dva da san na metle pometena i da me ne drži mesto, pod tri da na teh škrapah i otoci ni auti, a ja koda da san se rodila va njemu, pod četiri da san takov hipohondar ki bi najraje bival kraj špitala i završno – pod pet da ona sa svojeh osandeset i šest let nima namjeru selit na lanternu, a ja da se prez nje ne umen ni pocurat. Eto, ni za to nisan. Pitan ju pa da ča njoj ni neugodno ča j’ rodila takovo niš koristi kakovo je njeje mišljenje o mane i mojeh sposobnosti. Pogljedala me je onako kako to leh ona zna, a ja ta pogled zoven »ubojit z predumišljajen« obrnula se i sebe va bradu njurgajuć prošla va kupaonu. Ono ča san dok vrata nisu lupila čula bilo je – telica, nesnaga, lajavica, ja ne znan na koga j’ takova i sad bin ju oćepala. Znan da to ona se od ljubavi i pojidanja za me, ma sedno mi ni bilo lahko čut.

I na kraju ča? A niš, vrnimo se na početak – ako čujete ale kade pročitate da neki – ponavljan – prodaje velo stado za mići soldi i ako mislite da će ako dojde va moje ruki doć va prave ruki, javite mi. Valjda se do onda neću predomislet i otet bit pulitičar. Gljedaj, gljedaj ni to tako loša ideja!