S KAMIKA I MORA

Piše Slavica Mrkić Modrić: Muki po popisu

Slavica Mrkić Modrić

Foto Davor Puklavec/PIXSELL

Foto Davor Puklavec/PIXSELL

Iskreno reć, mane j’ to popiševanje toliko bezvezno da j’ to strašno.



Konačno san postala e-građanin, aš sila Boga ne moli, ale va mojmu slučaju mat je i Bog i sila. Lipo j’ rekla da ona z popison i popisivačon ne želi imet nikakove vezi i da neka lipo to odbavin preko škatule kako i sav normalan svit. Škatula je, shvatili ste – kompjuter. Neće ona ni čekat ni otpravljat niš. Šlus. Pogovor finjen. I ni bilo druge leh va Finu po ono neš i sedi drvo na drvo pa se popišuj. Odbavila san ja to fanj brzo, fanj se nasmela, a bome i fanj razjadila. Iskreno reć, mane j’ to popiševanje toliko bezvezno da j’ to strašno. Zač? Primjeri – ako ti napišen da bivan va stambenoj zgrade na prvomu katu ča me imaš pitat ako iman zahod va kuće i ako ta zahod ima protočni vodokotlić. Srce Isusovo, tr ne curan preko balkona, a ni va vrčinu pa hitan kroz poneštru. Onput me pitaš na ča se teplin i nudiš mi leh jednu opciju, a ja bin pošteno napisala da se teplin i na drva i na klimu.


Pa me pitaš ako iman kravi, stado ovac, konji i ostalu stoku krupnoga zuba, a ne pitaš me ako iman kućnoga ljubimca. Ne pitaš me ni ako iman internet, aš to ča se popišujen kod e-građanin, niš ne znači. Mogla san se popiševat i na »škatuli« od suseda. O pitanju ako iman prostor za kuhanje va stanu da ni ne govorin, a ono ča me j’ do suz nasmelo je bil moj paron. On je pak puknul na pitanje ako j’ od 25. kolovoza do 31. kolovoza uprihodoval bilo kakovi soldi. Ni. Ispalo je da čovik niš ne dela i jedino pod ča se je mogal prijavit, a da ne laže je bilo kućanica. Nakon toga ga ni pitalo ni za finjene školi, ni za niš aš se valjda podrazumijeva da kućanica nima nikakovo obrazovanje. To ga j’ tuliko razjadilo da j’ vas črljen počel zijat da ćemo bit jedina zemlja ka nima ni jednoga kućnoga ljubimca, ma ima najveć kućanic.


Mat je pak ponemela na pitanje o bračnomu statusu aš ako neki napiše da j’ udovica onput je bezobrazno pitat ako biva va bračnoj ale izvanbračnoj zajednice. Ali kad je ona rekla – logika, a ja san se počela kod luda smet, malo j’ falelo da ne dobijen oklepuh. Se va semu, mane j’ bilo fanj zabavno, ne radi pitanj od popisa leh radi reakcije ukućani, a njen ni ni malo. Ono ča j’ važno je da smo mi to odbavili i da san ja zažbljakala on sakramenski kod na vrata i na poštanski sandučić i dragomu Bogu zahvalila ča popis ni pušćal da se napišu opaski aš bin još vavek pisala aš njih dva ne bi prestali navrezat. Ono ča moju roditeljicu još vavek muči je kako će ona znat ako j’ bil popisivač i prepisal ta kod. Rekla san njoj da ću poć kupit nadzornu kameru i posest ju pred monitor pa neka kontrola. Odgovorila mi je to ča mi je odgovorila.




A kada smo već pu popisa, komać čekan da dojde kolegica Kostrenka pa da ju pitan ako j’ popisala i krdo diveh prasci ča jih va vrtu drži. Ja, more bit da oni spadaju va kućni ljubimci pa ne gredu va popis. A, hodi ga znat. Škerac na stran, ma to divo blago zbilja više ni normalno aš ako j’ verovat tomu sakramenskomu fejsu prasci su počeli decu i va školu slat, pa j’ tako spred Pomorske škole va Bakru jedan mićeri šećal koda išće kade mu j’ razred. Kraljevičanon ni niš bolje leh je susedimi va Bakru ale onemi va Kostrene ale onemi va Vinodolu aš i pu njih je toga divoga blaga vagun. Apsolutno se slažen z kraljevičken gradonačelnikom, šjor Čandrlićen – sami smo si krivi za ovo ča se dogaja. Niki već ne čisti ni privrat, a kamo umejki i dolci okol kuće. Saki drugi ima privatnu prašumu, a uza se to i veće oči leh rit pa jido fini va baje namesto va trbuhu.


I ča j’ tu prasac kriv, on je leh došal od tamo kade ni imel ča jist na mesto na komu ima banket. Sad da bin se složila okol sterilizacije blaga, e to ne bin ma kuliko se to va nekemi drugemi zemljemi pukazalo kod dobro rešenje. Ne volin ograničavat slobodu izbora vezanu uz imet decu ale ne ni ljuden, ni blagu.
Intanto, bit će ča bude i kako bude, a si oni ki su nedelju misleli poć šećat po Kostrene i okolo nje, šegavo bi bilo da promene rutu aš će na potezu od Žuknice do Urinja bit va tijeku akcija izgona i uklanjanja divljači. Kostrenjani bi trebeli pripazit i na se i na svoji kućni ljubimci pa i sebe i njih zapret va kuću aš vranića ne rabi potezat za rep. A i ne daj Bog se ljubimcu ča dogodi kako ćeš dokazat da si ga imel kad ga nisi popisal.