Si već znate da ovu zimu neće bit nijedne karnevalske povorki Rečkoga karnevala. Neće se ni kraljica zibirat, a bome se neće ni još čuda toga, ča j’ bilo pod normalno va onomu staromu normalnomu, dogodit. Kako govore čelni ljudi od Karnevala, Turističke zajednice grada Riki i samoga grada – ni da neće bit leh će se bobić pomestit. Do kakovoga petoga ale šestoga meseca, to j’ sad teško reć, aš čovik snuje, a pandemija određuje. Kada j’ ta vijest zišla va javnost nastal je pravi šušur.

Društvene mreži su se zapalile, ljudi su se počeli karat huje leh okol ustaš i partizanih, okol HDZ-a i SDP-a, huje leh okol poć se cepit ili bit anitivakser. Moran priznat da mi j’ bilo jako veselo čitat ta karanja i ti komentari. Najme, postojala su tri tabora. Prvi ki ni da se karnevalska zbivanja meste na leto aš se, kako j’ jedan napisal, zna da pust počinje na istoku rečkoga prigrada, prvu sobotu pokle Tri kralji, na zapadnomu kad zatuli Antonjski rog, a se fini na Popelnicu, i tako j’ od kada je svita. Drugi tabor je mišljenja kako ov prvi tabor mora malo kalmat i kako j’ bolje da se karneval održi i po lete leh da ga opće ni. Treći tabor su si oni ki mrze karneval i vrit šalju prva dva tabora.

Tradicionalisti njurgaju kako Rečki karneval ne postoji da bi bil turistički proizvod leh da bi čuval tradiciju. Pobornici karnevala po lete ili grupa »bolje ikad nego nikad« pak govore da su tradicionalisti licemjeri aš kad se rečki karneval proglasi jednin od najboljeh va svitu onput su kuntenti i ne razmišljaju je to turistički proizvod ale ča. One ki nimaju rado masku i maškari pak govore da ako nan se turizam bazira na karnevalu – jadna nan palenta. Tu san se zajedno zapitala su oni kada čuli za Rio.

Ako vas zanima moje mišljenje, a i ako ne, ja ću van ga svedno povedat. E, pa ča se mane tiče ja bin da j’ pust celo leto. Oni ča me poznaju će sad reć da, ako j’ gljedat po tomu kakova z kuće zijden vanka, mane i je pust celo leto. Zajik pregrizli. Zbilja niman nikakov problem da va somu ovomu nemilu karneval bude odgođen za neka bolja vrimena, odnosno kad ta korona projde tako kamo virusi kad tad projdu – mater ženit. Jako bin bila kuntenta da to zbilja bude već na proliće. Ono ča j’ moj predlog je da Rika ubuduće ima, i zimski, i letnji karneval. Tako će bit si zadovoljni i oni već spominjani prvi, ča bismo rekli tradicionalisti, i oni već spominjani drugi, turizmu naklonjeni. Jedino ki bi se vjerojatno preselil negdere kade se beseda karneval nikad ne spominje je on treti tabor.

Kad smo već pu selidbe i raseljavanja, rezultati popisa stanovniki nisu nan baš dobri. Ni da nismo znali da ćemo past spod četiri milijuna, ma sedno j’ bilo grdo čut. Ni Rika, ni Županija nisu nikakova iznimka i sad malo gljedan kako ona računica od prvo par let ne drži vodu. Znate ono kad se j’ smanjeni broj stanovniki na području Riki pravdal s ten da ljudi ne gredu ni va Njemačku, ni va Irsku, ni nigdere drugde leh da se sele va rečki prsten.

E, pa broji govore da j’ i va županije broj stanovniki pal pa će nažalost bit prvo da j’ i naša mladost trbuhom za kruhom prošla puno dalje od Kastva, Viškova, Hreljina ale koga drugoga blizoga nan mesta. Kuliko smo stara nacija? A, ča reć leh – preveć. Imamo li više dece leh ča imamo pasi i mačak? Na to pitanje van neću moć niš reć aš mane na samopopisivanju ni pitalo ako iman kućnoga ljubimca, mada mislin da su pasi brojneji. Ma se va to neću pačat da me ne tuka isto ča i Papa Franju ki’vo dan.
I za kraj – adventi. Finili su, va nekih gradih prvo, va nekemi pokle, se j’ ovisilo kada su komunalni delavci zneli ukrasi.

I naravno da će sako mesto reć kako j’ njihov nil najlipji, najsjajneji, najposjećeniji i se naj, ali ima tu portal gradonačelnik.hr ki j’ na onomu sakramenskomu fejsu organiziral glasanje za najlipji advent va Hrvaskoj. Va konkurencije je bilo 36 gradi i osan općin, a ljudi su svojimi lajkimi najlipjin adventom proglasili onoga va Osijeku. Naš opatijski se smestil na šesto mesto ča i ni loša pozicija jedino mi j’ žal ča pokle ovoga FB glasanja ne vredi on slogan od Opatije ki glasi – »najljepši advent uz more«. Zač? Pa, da njin pas kurbu prasicu i pol i onemi z Šibenika, ča se nisu plasirali na peto mesto. Uf, baš ni va redu.