snimio Marin ANIČIĆ
A pasanu subotu su opatijski Lumberaši, va čast semi onemi entuzijasti kako ča su to, spomenimo samo nekeh - Mario Meak, Livio Benčinić, Ivo Benčinić, Justo Terčić, Livio Grozić, Vinko Grozić, Dragić Benčinić i drugi, va Gervaise parićali pravi, šesni pusni tanac po nekadajnu
Zazimelo je, aš »zima mora storit svoje«, pak su i maškare prišle »na svoje«. Ni njin zima aš »mi smo mi, mi smo mi, mi smo z Lumbera doma, mi smo z Lumbera doma«… Poznati opatijski »Lumber klub« na kup pospravja judi od pusta već više od pedeset let, aš je osnovan sada već dosti davnega 1966. leta. Teh judi ki su bili njegovi osnivači danaska uglavnon već ni, ale su fanj pasali va »zrela« leta, ma su užancu nastavila rivat naprvo njihova deca.
Maškare su prezele vlast na celoj Liburnije i magari je »peto godišnje doba« ovega leta »kratko i slatko«, uz parolu »finke dura non paura« saki je vikend »pod kontrolun« maškar.
Da se ne pozabi
A pasanu subotu su opatijski Lumberaši, va čast semi onemi entuzijasti kako ča su to, spomenimo samo nekeh – Mario Meak, Livio Benčinić, Ivo Benčinić, Justo Terčić, Livio Grozić, Vinko Grozić, Dragić Benčinić i drugi, va novoj opatijskoj štacije od kulture, va Gervaise parićali pravi, šesni pusni tanac po domaću, po nekadajnu. Bila je to zimska RetrOpatija. Da se ne pozabi. Organizatorsku palicu je držala Olivera Tomičić Oli, a tancalo se je na muziku od Duleta i Bonaci i od Kantridersi. Tancalo je i staro i mlado, a najlepše su maškari dobile, jušto kako je to bilo i nekada na takoveh tanci, lepe nagradi.
Tanac, smeh, hofirancija i pusne nemotarije tako su se opeta vrnule v Opatiju ka je odvavek hodila ruku pod ruku z karnevalon.
Aš, maškare su nan vavek va srce…
Subotu se je tancalo i va Lovrane, va restorane Kvarner i to najprvo deca, a hvečeru i sledić »zreleje« maškari. Sopal je Marinero band, pak se je i va Lovrane ki odvavek štima pust, feštalo do kasneh ur. Aš kada pride korizma – kasno će bit spravjat se za va maškare i morat će se počekat se do Antonji 2019. leta…
A još od pasanega petka v Opatije je bilo jako veselo. Najprvo va Sporckoj dvorane Marino Cvetković kade je bil deveti po rede Maškarani klapski maraton. Kako i sako leto – bila je to štorija za sebe.
Kako smo čuli – za iduće se, deseto izdanje Maškaranega klapskega maratona zainteresirala i hrvacka »dalekovidnica«, pak ako se zaspraven dogodi i snimanje za televiziju – ovaj maškarani duh našega domaćega kraja će pasat doslovce va saku kuću po Hrvackoj.
Nebo nas voli
Žejane pune snega su za vikend »zvonile« tuta forca uz smotru mićeh zvončarići. Zafriškalo je, pak su zvončarići imeli teško delo -onako mići zimu i nevajati duhi ća potirat. Ma su ipak se ono ča njin je bilo delo – arivali storit i to jako, jako dobro.
Za ten je čera prišla jubilarna, 35. Balinjerada v Opatije, a za njun i pusna parada va Lovrane – pak se je još jedanputa pokazalo da se ne reče prez vezi da »se ča je nemo, to je naše«. Isto tako, pokazalo se je i da, magari i si dani spreda Balinjeradi i lovranske povorki dažilo – kada pride »ta« nedeja – nebo će bit plavo, a vreme sunčano. Tako je bilo i čera, pak su Opatija i Lovran, biseri »Opatijske rivijere« cel dan, pa i do škurega, jušto onako kako to reču Matujci ken se i jena šesna grupa tako zove – »zijali, sopli, tancali i pili«. Živio Pust!
