Kraj leta je, si neš zbrajaju i prebrajaju, oduzimaju i dodavaju, a ja kod i vavek – niš. Mislin si, a ča se iman sad ovraćat, ionako ča je bilo bilo je i niš ne moren ni promenit, ni popravit, a za prolevenen mlekon ni ča plakat. Tako da ja i dalje – ni brige, ni pameti. Ča se pak tiče leta ko paseva, ako gren gljedat z nekoga, ala recimo – društvenoga aspekta, pa spametin se i hujeh, a i boljeh. Bilo j’ i ovako, i onako. Z puno stvari se ne bin složila da j’ bil neki bedast pa me pital, ma morda bi moje odluki bile sto put huje od oveh keh su donesli oni ča su na vlaste.

Da mi j’ neš falelo va 2023. i ni. Uostalon, ja san van on tip čovika ki njurga na van, a zaspraven se sako jutro, ale va mojen slučaju okol desete-jedanajste, kad se zbudin, zahvalin Svevišnjemu i njegovoj svite, i Svemiru i Nemiru i komu god na činjenice da san se zbudila, aš živa san, a živi čovik more ča god će. Mrtvi baš i ne. Eventualno poć glasat. Kad smo već pu glasanja, leto ko nan dohaja sobun nosi i izbori, a od toga me već sada lovi nervoz. Zač? ma, kako zač? Ki će jih sada naslihat. Ta njihova obećanja ludon radovanja, ta načinjanja, litratanja, povedanja, namaljanja i ovo smo, i ono smo, i ovo ćemo, i ono ćemo… Ali, ča je – tu je, pa ćemo lipo na izbori. Morda ov put zrušimo rekord va nezihajanju na birališta, a pokle postavimo onaj o njurganju na rezultati.

Njurgan i ja, ma i biran pa si mislin da na njurganje iman zajamčeno pravo. Iskreno, njurgala bin i da ne gren na izbori, ma ovako iman pokriće. Sad, kad malo bolje razmislin, dohajan do zaključka da će mi ovi izbori ki dohajaju zadat veli problem. Najme, ne nahajan se nigdere. Se to ča se nudi mi gre na živci aš mi je to se već viđeno, prožvakano, bledo i neuvjerljivo. Blažena moja mat, ona bira ne po tomu ča ki govori leh po simpatije. Ako j’ neki šesan, miran i pristojan, more reć ča god će, ma i da će njoj penziju zet, ona je za njega i njegovu stranku, tako da Plenković, ča se nje tiče more mirno spat. Ča se mane tiče, si oni moru mirno spat aš mi nidan nit smrdi, nit diši.

Ma, dosti od politike. Ono ča mane veseli je da će od te cesti Križišće – Žuta Lokva bit neš, da će Rika valjda za zbilja i konačno dobit ta sakramenski autobusni kolodvor, a more bit će zaspraven i ta stadion Kantrida doživet još jedno rojenje. Leh da ne bude kod va onoj pjesme od Dragojevića – dva put san umra. Avah je mane. Ni da me pojida nogomet i slično, ma ja to igrališće na Kantride gljedan kod jedan od spomeniki ovoga grada, a ne kod mesto na ken tamo neki ljudi pikaju.

Ono ča bin još volela je da se Rika sopeta obuče va on svoj prepoznatljiv veštid. Ki? Pa, on koga j’ stoljećimi nosila, a bil je zašiven od kulturi, tolerancije, progresa i drugačjeg. On va komu je zgljedala kod svjetski grad, a ne kod sestra blizanka – sopeta ću reć Bačkoj Palanke, a zaspraven ne znan kako ta sakramenska Palanka zgljeda aš nisan tamo nikada bila, pa san ju brižnu morda, po ki zna ki put, i uvredila. Smiron mislin ča njoj se brižnoj dogodilo. Sa j’ nekako po tloh. Koda j’ va depresije. Ni ne upleta se, ni ne pere baš često, sa je raskopana i ruvinana, a tek kako zvuči, o tomu ne želin ni mislet. Koda j’ korona ubila se ono lipo va njoj. Rabi njoj jedan dobar psihijatar ki bi njoj, veruje, pod zajedno propisal nekakovi turbo antidepresivi da malo živne, da dojde na se. Znan da saki grad čine ljudi pa šegavomu dosti…

Želin da se i k letu čitamo, da se si skupa jedan sled već volimo leh ča se damo, želin da nan dohtori ča manje rabe aš ionako ih ni pa ih moramo šparat aš ako ovako nastavi sopeta će bit va mode nadridohtori i mast od puževe slini, žabljega kraka i ča ja znan česa još, a te pomadi su skupe kod vranić. Ja to najbolje znan aš ni masti za kolena ke ja nisan kupila gospe mame. Ćete nekakovu vražju pandžu ale kandžu, pa on rilif, dip i sakakov, pa onu od kostanji, pa od vinove lozi, pa onu ča hladi, onu ča j’ konj narisan… I zamislite, nidna ni pomogla, ma sedno koda j’ jedan sled lagje. Me par da ni ni njoj ni momu takujinu, ma ako ona misli da je – kupit ću njoj ako rabi i konja, a ne leh konjsku mast.

Intanto, srićno van bilo, želin van jušto se ono ča želin i sebe.